(இ - ள்.) அரும்பரி மகம் தொண்ணூற்றாறு செய்துழி - செய்தற்கரிய
பரிவேள்வி தொண்ணூற்றாறு செய்த விடத்து, சுரும்பு அரி பெரும்படைத்
தோன்றல் - மலைகளின் சிறகினை அரிந்த பெரிய வச்சிரப்
படையினையுடைய இந்திரனானவன், தண் நறா விரும்பு அரி முரன்று சூழ் -
குளிர்ந்த தேனை விரும்பும் வண்டுகள் ஒலித்துச் சூழ்கின்ற, வேம்பின் அம்
குழை - வேம்பினது அழகிய தளிரை யணிந்த, பொரும் பரிவீரன் மேல் -
போர் செய்யும் குதிரைகளையுடைய வீரனாகிய உக்கிர வழுதியின் மேல்,
பொறாது - மனம் பொறாது, பொங்கினான் - வெகுண்டான் எ - று.

     தொண்ணூ றென்பது விகாரமாயிற்று. வேம்பின் றளிராற்
றொடுக்கப்பட்ட கண்ணி; "வேம்பினொண்டளிர்" எனப் புறப்பாட்டில் வருவது
காண்க. நூறு வேள்வி புரிந்திடின் தன் பதவிக் குரியனாவன் என்னுங்
கருத்தாற் பொறாதவனாயினான். (3)

     (இ - ள்.) மன்னிய நாடு எலாம் - நிலைபெற்ற தன் நாடு முழுதும்,
வான்வளம் சுரந்து - மழை வளம் மிகுந்து, இயல் பொன் நாடு போல்
பொலிதலால் - அழகிய பொன்னுலகம் போல விளங்குதலானன்றே, இந்த
மின்னிய வேலினான் - இந்த ஒளி பொருந்திய வேற் படையையுடைய
உக்கிரவழுதி, வேள்வி செய்வது என்று உன்னிய மனத்தன் - வேள்வி
செய்கின்றது என்று கருதிய மனத்தினாய், ஓர் சூழ்ச்சி உன்னினான் - ஒரு
வஞ்சனையை நினைத்தான் எ - று.

     செய்வது பொலிதலானன்றே என்றுன்னிய வென்க. செல்வம் மிக்கு
வானிலுள்ள பொன்னாடு போல் எனலுமாம். செய்வது : தொழிற்பெயர். (4)

     (இ - ள்.) பொரும் கடல் வேந்தனை - அலைகள் மோதும் கடலின்
மன்னனாகிய வருணனை, கூவி - அழைத்து, பொள்ளென - விரைந்து
இருங்கடல் உடுத்த பார் ஏழும் - பெரிய கடல் சூழ்ந்த ஏழு தீவுகளையும்,
ஊழிநாள் ஒருங்கு அடு வெள்ளம் ஒத்து - ஊழிக்காலத்தில் ஒரு சேர
அழிக்கும் வெள்ளத்தைப் போன்று, உருத்துப்போய் வளைந்து -
சினந்துபோய் வளைந்து, அருங்கடி மதுரையை அழித்தி என்றான் - அரிய
காவலையுடைய மதுரையை அழிப்பாயாக என்று கூறினான் எ - று.

     பொள்ளென அழித்தி யெனக்கூட்டுக. பொள்ளென : விரைவுக் குறிப்பு.