(இ - ள்.) வீங்கு இருள் ஒதுங்க - மிகுந்த இருள் ஓடுமாறு, மேகம்
மின் விதிர்த்து என்ன - முகிலானது மின்னலை வீசினாற்போல, கையில்
ஓங்கு இருங் குலிச வேலை - கையிற் றாங்கிய மிகப் பெரிதாகிய வச்சிரப்
படையை, ஒல்லென விதிர்த்தலோடும் - விரைவாக அசைத்தவுடனே, தீங்கு
உடல் கள்வன் - கருமையுற்ற வலிய உடலையுடைய திருடனாகிய
விருத்திரன், அஞ்சி - பயந்து, வாங்கு இருங்கடலில் வீழ்ந்தான் - வளைந்த
பெரிய கடலினுள் வீழ்ந்து மறைந்து, மறைந்த மை நாகம் ஒத்தான் -
முன்கடல் மறைந்த மைநாகமலையை ஒத்தான் எ - று.

     விதிர்த்தென்ன : விகாரம். ஓங்கிரு : ஒருபொரு ளிருசொல். குலிச
வேல் : பண்பொட்டு. உளமும் உடலும் இருண்ட; உளம் கரிதாதலை ‘அகம்
குன்றி மூக்கிற் கரியார்’ என்னும் குறளானும், ‘கூழின் மலி மனம் போன்றிரு
ளாநின்ற கோகிலமே’ என்னும் திருக்கோவையானும் அறிக. போன்று -
போல; எச்சத்திரிவு. வீழ்ந்தான் ; எச்சம்; வீழ் மறைந்து என்க. கரிய
வுருவானும் பெரிய வடிவானும் வச்சிரத்திற் கஞ்சிக் கடலுள் ஒளித்தலானும்
மைநாகம் உவமையாயிற்று. மைநாகம் - இந்திரன் வச்சிரத்தால் மலைகளின்
சிறகுகளை யறுத்த ஞான்று வாயுவின் உதவியாற் கடலுளொளித்த ஓர் மலை. (48)

     (இ - ள்.) ஒக்க - அவனோடு கூட. இந்திரனும் வீழ்ந்தான் - இந்திரனும் விழுந்து, உடல் சினம் - மாறுபடும் சினத்தையுடைய, உரும் ஏறு அன்னான் புக்க இடம் தேடிக் காணான் - இடியேறறை ஒத்த விருத்திரன் புகுந்து ஒளித்த இடத்தைத் தேடிக் காணாமல், புண்ணியம் முளரி அண்ணல் பக்கம் வந்து - தூய்மையாகிய தாமரை மலரில் வசிக்கும் பிரமனிடம் வந்து, அனைய செய்தி பகர்ந்தனன் - அந்தச் செய்தியைக் கூறினன்; சராசரம் ஈன்ற தாதை - இயங்குவனவும் நிற்பனவுமாகிய எல்லாவற்றையும் தந்தருளிய தந்தையாகிய பிரமனானவன், பதகன் மாளத்தக்கது ஓர் சூழ்ச்சி முன்னி - பாதகனாகிய அசுரன் மாளத் தகுந்ததாகிய ஒருபாயத்தை எண்ணி எ - று.

     ஒப்ப - உடனாக. உடல் சினம் : பொருபோர் என்பதுபோல நின்றது; உடலுதல் - சினத்தல். புக்கவிடம் புக்கிடமென விகாரமாயிற்று. புண்ணியம் - தூய்மை. அனைய : சுட்டு. தாதை - பிரமன்; பெயர். (49)

     (பா - ம்.) * பகைகளெல்லாம். +செப்ப; சொல்வான்.