இருது - பருவம்; கார், கூதிர், முன்பனி, பின்பனி, இளவேனில்,
முதுவேனில் என்பன; ஈண்டுக் கூறியது இளவேனிலை. தகர் - ஆடு;
மேடம். தாரகை - அசுவதி முதலிய இருபத்தேழு நட்சத்திரங்கள்
சித்திரையிற் சித்திரை யென்றது அநுவாதம். (94)

     (இ - ள்.) துறக்க நாடு அணைந்து - துறக்க வுலகத்தையடைந்து,
சுத்த பல்போகம் துய்த்து - தூய பல போகங்களை நுகர்ந்து, மேல் - பின்,
மல பரிபாகம் பிறக்க - மலபரிபாகம் உண்டாக, நான்முகன் மால் முதல் -
பிரமன் திருமால் முதலிய, பெருந் தேவர் பெரும் பதத்து ஆசையும் - பெரிய
தேவர்களின் பெரும்பதவியிலுள்ள விருப்பமும், பிறவும் மறக்க - மற்றைய
விருப்பமும் ஒழிய, நாம் வீடு வழங்குதும் என்ன வாய்மலர்ந்தருளி - நாம்
வீடுபேற்றை அருளுவோம் என்று திருவாய் மலர்ந்தருளி, வான் கருணை
சிறக்க - சிறந்த அருள் ததும்ப, நால்வேதச் சிகை எழும் - நான்கு
மறைகளின் முடிவில் விளங்கும். அனாதி சிவபரஞ் சுடர் - அனாதியாகிய
சிவபரஞ்சோதி, விடைகொடுத்தான் - விடைகொடுத் தனுப்பினான் எ - று.

     மல பரிபாகம் - ஆணவமல நெகிழ்ச்சி; இருவினை யொப்பும், சத்தி
நிபாதமும் உபலக்கணத்தாற் கொள்க. பிறக்க, காரணப்பொருட்டு. மறக்க -
மறந்தவளவில். சிகை - முடி; ‘அதர்வசிகை’ என்பது காண்க. (95)

     (இ - ள்) விண்ணவர் நாதன் - தேவேந்திரன், புளகப் போர்வை யால்
யாக்கை மூடியான் - புளகமாகிய போர்வையினால் உடல் மூடப் பட்டான்;
முடிமிசை - சென்னியின்மேல், அஞ்சலிக் கமலம் சூடினான் -
கைத்தாமரைகளைக் கூப்பினான்; வீழந்தான் - கீழேவிழுந்து வணங்கினான்;