எழுந்து கண் அருவி துளும்பினான் - எழுந்து கண்களினின்றும்
இன்பவருவிளை ஒழுக்கினான்; பல்முறை துதிசெய்து ஆடினான் -
பலமுறையுந் துதிமொழி கூறிக் கூத்தாடினான்; ஐயன் அடி பிரிவு ஆற்றாது
அஞ்சினான் - இறைவன் திருவடிகளைப் பிரிவதற்கு ஆற்றாமல் அஞ்சினான்;
அவன் அருள் ஆணை நாடினான் - அவன் அருளிய ஆணையை நாடி,
பிரியா விடைகொடு - உள்ளம் பிரியாத விடை பெற்று, துறக்கம்
நண்ணினான் - துறக்க வுலகிற் சென்றான் எ - று.

     அஞ்சலி - கூப்பிய கை. ஆணை - அருளிப்பாடு. பிரியாவிடை -
பிரிதற்கு மனம் பொருந்தாத விடை. (96)

     (இ - ள்.) அரமங்கையர் மருங்கு வந்து கவரி வீச - தேவமகளிர்
பக்கத்தில் வந்து சாமரை இரட்டவும், மந்தாரம் கற்பகம் பூமாரி தூற்ற -
மந்தாரமும் கற்பகமும் மலர் மழை பொழியவும், அந்தரநாட் டவர்கள்
முடிகள் அடிகள் சூட - துறக்க நாட்டினையுடைய தேவர்களின் முடிகள்
அடிகளாகிய (மலரை) அணியவும், அயிராணி முலைத்தடம் தோய்ந்து -
இந்திராணியின் பெரிய கொங்கைகளி லழுந்தி, அகலம் திண்தோள் - மார்பும்
வலிய தோள்களும், விந்தம் எனச் செம்மாந்து - விந்த மலையைப்போல
இறுமாந்து, விம்மு காமவெள்ளத்துள் உடல் அழுந்த - பெருகிய காம
வெள்ளத்தினுள் உடலானது அழுந்தி நிற்க, உள்ளம் சென்று - மனமானது
சென்று, சுந்தரநாயகன் கருணை வெள்ளத்து ஆழ்ந்து - சோமசுந்தரக்
கடவுளின் அருள் வெள்ளத்தில் அழுந்தி நிற்க, துறக்க நாடன் - தேவ
வுலகத்தினையுடைய இந்திரன், தொல் முறையில் - பழைய முறைப்படியே,
முறை செய்தான் - அரசு புரிந்தான் எ - று.

     ஐந்தருக்களில் இரண்டு கூறினமையால் ஏனையவுங் கொள்க.
செம்மாந்து என்னுஞ் சினைவினை முதன்மேல் நின்றது; செம்மாக்க என்பதன்
திரிபுமாம். ஆழ்ந்து : எச்சத்திரிபு. (97)

ஆகச் செய்யுள் - 439.