ஆனந்தமே வடிவமாகக் கொண்டதாகிய ஒப்பற்ற சிவலிங்கமானது, எதிர்
தோன்ற - எதிரே தோன்றாநிற்க, கும்பிட்டு - வணங்கி, அண்டர் நாயகனைப்
பூசை செய்வதற்கு அன்பு தோன்ற - தேவர்கட்கு நாயகனாகிய அச்
சொக்கலிங்கப் பெருமானைப் பூசிப்பதற்கு அன்பு உண்டாக எ - று.

     காட்சி அறிவுக்கும், அறிவு குடைதற்கும், குடைதல் வடிவந்
தோன்றலுக்கும், அருட்கண் தோன்றல் குறியெதிர் தோன்றுதலுக்கும்
காரணங்களாம். அச்சிவலிங்கத்தில் எழுந்தருளியிருக்கின்ற நாயகனை
எனலுமாம். அன்பு தன் மனத்திற் றோன்ற வென்க. (22)

     (இ - ள்.) தூம்பு உடை கையில் மொண்டு - தொளையையுடைய
துதிக்கையினால் முகந்து, மஞ்சனத் தூநீர் ஆட்டி - திருமஞ்சனமாகிய
தூயநீரால் ஆட்டி, தேம்புடை ஒழுக - தேன் புறத்தில் ஒழுக, பள்ளித்
தாமமும் தெரிந்து சாத்தி - திருப்பள்ளித் தாமத்தையும் ஆராய்ந்து சாத்தி,
பாம்பு உடைத்து ஆய வேணிப் பரனை - பாம்பினை அணியாக
உடையதாகிய சடையினையுடைய இறைவனை, அர்ச்சிக்க - வழிபட,
உள்ளத்து ஆம்புடை அறிந்த - உள்ளத்தின்கண் எழுந்த (அன்பின்)
திரட்சியை உணர்ந்த, எந்தை - எம் தந்தையாகிய சோம சுந்தரக் கடவுள்,
ஆனையை நோக்கிக் கூறும் - யானையைப் பார்த்து அருளிச் செய்வான்
எ - று.

     மொண்டு : முகந்து என்பதன் மரூஉ. தேன் தேமெனத் திரிந்தது.
தெரிந்து - குற்றமற ஆராய்ந்து. புடை - பக்கம்; பக்கம் - அன்பு; எனக்
கொள்ளலுமாம். (23)

     (இ - ள்.) நீ வந்தது எவன் - நி வந்த காரணம் என்னை, வேண்டும்
வரம் எவன் - நீ விரும்புகின்ற வரம் யாது, உரைத்தி என்ன - கூறுவா
யென்ன, சிந்தையில் அன்பு கூர்ந்த - உள்ளத்தில் அன்பு மிகுந்த, தெய்வத
வேழம் - தெய்வத் தன்மை பொருந்திய வெள்ளை யானை, தாழ்ந்து -
வணங்கி, முந்தையில் விளையும் - முற்பொழுதில்நிகழ்ந்ததனையும், வந்த
முறைமையும் - வந்த தன்மையையும், முறையால் கூறி - முறைப்படச்
சொல்லி, எந்தையை அடையப் பெற்றேற்று - எம் தந்தையாகிய நின்னை
அடையப்பெற்ற எனக்கு, இனி ஒரு குறை உண்டாமோ - மேல் ஒரு குறை
உண்டாகுமோ (ஆகாது) எ - று.

     வந்தது - வந்து காரணம்; ஐ : சாரியை; திரி சொல்லுமாம். எவன்.
வினாப்பெயர். முந்தையில் : காலம் இடமாயிற்று. ஓகாரம் : எதிர்மறை. (24)