(இ - ள்.) மாந்தர் பயில் மூவறு சொல் மாநில வரைப்பில் - மக்கள்
வழங்குகின்ற பதினெட்டு மொழிகளுள்ள பெரிய நிலவுலகத்தில், தீந்தமிழ்
வழங்கு திருநாடு சிறப்ப - இனிய தமிழ் மொழி வழங்குகின்ற அழகிய நாடு
சிறந்து ஓங்கவும், ஆய்ந்த தமிழ் நாடு - சங்கமிருந்து ஆராய்ந்த அத்
தமிழ்நாட்டின் மண்டலங்களை, அரசு அளித்து முறை செய்யும் - அரசாண்டு
நீதி செலுத்துகின்ற, வேந்தர்களில் - மன்னர்களில், மீனவர் விழுத்தகைமை
எய்த - பாண்டியர்கள் சிறந்த பெருமையைப் பெறவும் எ - று.

     மாந்தர் பயிலாத நிலமு முண்டாகலின் ‘பயில்’ என்றார். பதினெண்
மொழி முன்பு உரைக்கப்பட்டன. தமிழகத்திற்குத் திருநாடு என்பதும் ஒரு
பெயர் போலும். அது : பகுதிப்பொருள் விகுதி. வேந்தர்கள் - சேர,
பாண்டிய, சோழர்கள். திருத்தொண்டர் புராணத்துள் திருஞானவம்பந்தரின்
திருவவதாரம் கூறும் வழி ‘திசை யனைத்தின் பெருமையெலாம் தென்றிசையே
வென்றேற’ என்பது முதலாகக் கூறியுள்ளன இங்கு நோக்கற் பாலன. (14)

     (இ - ள்.) அழல் எரிக் கடவுள் - தீக் கடவுள், நோற்ற பயன்
நொய்து எய்த - தவஞ் செய்த பயனை எளிதில் அடையவும், கொய்
தளிரென - கொய்யப்பட்ட தளிர்போல், தழல் கொழுந்து படு குண்டத்து -
நெருப்புக் கொழுந்து விட்டேரிகின்ற வேள்விக் குண்டத்தின்கண்; ஐது
அவிழ் இதழ் கமலம் - அழகியதாக விரிந்த இதழ் களையுடைய தாமலை
மலர், அப்பொழுது அலர்ந்து - அப்போதே விரியப்பெற்று, ஓர் மொய்
தளிர் விரைக்கொடி - நெருங்கிய தளிர் களையுடைய மணமுள்ள ஒரு
கொடியானது, முளைத்து எழுவது என்ன - தோன்றி மேலெழுவதைப்
போலவும் எ - று.

     நொய்து - விரைய. அழல் எரி, ஒரு பொருளன. கொய்தளிர்
குழைவுக்கும் நிறத்துக்கும் உவமை. ஐது - அழகிது; நுண்ணிதுமாம். ஐதவழ்
என்னும் பாடத்திற்கு அழகு தவழும் என வுரைக்க. அலர்ந்த என்னும்
பெயரெச்சம் ஈறு தொக்கதுமாம். இச்செய்யுளின் மூன்றாமடி முதல் குழவியின்
எழிலும் தோற்றமும் கூறுகின்றார். (15)

     (இ - ள்.) விட்டு இலகு சூழியம் விழுங்கு - ஒளிவிட்டு விளங்கா
நின்ற முத்துச் சூழியத்தால் விழுங்கப்பட்ட, சிறு கொண்டை - சிறிய
கொண்டையானது, வட்டம் மதிவாய் - வட்டமாகிய சந்திரனிடத்துள்ள,