(இ - ள்.) திருமுடியை மதயானை மிசைவைத்து - அழகிய கிரீடத்தை
மதத்தினைடய யானையின்மேல் வைத்து, நகரை வலம் செய்து பூசித்து -
நகர்வலஞ் செய்வித்துப் பூசித்து, அருமணியால் சுடிகை இழைத்து - அரிய
மணிகளால் சூட்டுச் செய்து, ஆடகத்தால் குயிற்றியது ஓர் ஐவாய் நாகம் -
பொன்னாற் செய்யப்பட்டதாகிய ஒரு ஐந்தலை நாகமானது, பெருமணி நீள்
படம் - பெரிய மணிகளையுடைய நீண்ட படங்களை, மிசை பரப்பி கவிப்ப -
மேலே பரப்பிக் கவிக்குமாறு (செய்த), அச் சிங்க பீடத்து - அந்தச்
சிம்மாதனத்தில், குருமணி வாள் நகை மயிலை ஏற்றி - நிறம் பொருந்திய
முத்துப் போலும் வெள்ளிய பற்களையுடைய மயில் போலும் பிராட்டியாரை
ஏற்றி, கும்பத்துப் புண்ணிய நீர் குளிர ஆட்டி - கடத்தில் நிறைந்த புண்ணிய
நீரினால் குளிருமாறு திருமஞ்சனஞ் செய்வித்து எ - று.

     செய்வித்து என்பது செய்து என நின்றது. குயிற்றியது : செயப்பாட்டு
வினைப் பெயரெச்சமாயிற்று. கவிப்ப ஏற்றி எனினுமாம். நீரால் ஆட்டி. (38)

     (இ - ள்.) புங்கவர் மந்தார மழைபொழிய - தேவர்கள் மந்தார மலர்
மழையைப் பொழியவும், அருந்தவர் ஆக்கம் புகல - அரிய முனிவர்கள்
ஆசி கூறவும், தெய்வப் பங்கயமென் கொம்பு அனையார் ஆட -
தெய்வத்தன்மை பொருந்திய தாமரை மலர்ந்த மெல்லிய பூங்கொம்பினை
ஒத்த தேவமகளிர்கள் ஆடவுத், முனி பன்னியர் பல்லாண்டு பாட -
முனிபத்தினிகள் பல்லாண்டு பாடவும், மங்கல தூரியம் முழங்க - மங்கள
வாத்தியங்கள் ஒலிக்கவும், மறை தழங்க - வேதம் முழங்கவும், எம் கருணைப்
பெருமாட்டிக்கு - எம் பெருங் கருணைப் பிராட்டியாருக்கு, மாணிக்க மகுடம்
சூட்டி - மணிமுடி சூட்டி, அரசு அமைச்சர் பணியும் தன் இறைமை நல்கா
-அரசர்களும் அமைச்சர்களும் வணங்கப் பெறும் தன் தலைமையைக்
கொடுத்து எ - று.

     பொழிய என்பது முதலிய செயவெனெச்சங்கள் சூட்டி யென்பதனோடு
தனித்தனி முடியும். ஏனை அரசரும் அமைச்சரும் பணியும் தலைமையைப்
பெருமாட்டிக்கு நல்கி. (39)