பரிதி - ஆக்கினா சக்கரமும் ஆதித்தனும் ; இரட்டுற மொழிதல்.
சக்கரம் காய்தலாவது, பகைவரையும் கொடியோரையும் ஒறுத்தல். ஒளி -
புகழ்; நிழலாகிய ஒளியெனினுமாம். நீழல், நீட்டல். மாயிரு :
உரிச்சொல்லாகலின் யகர உடம்படு மெய் வந்தது. அரச பத்தினிகள் தம்
கணவரோடு அரியனை யமர்ந்து அரசாளு முரிமை யுடையவர்; இவர்
அங்ஙனமின்றித் தனியாக விருத்தலைக் கருதித் ‘தனியர சிருக்கும்’ என்றார்.
பொதுவின்றி அரசாளுதல் எனினுமாம். (2)

     (இ - ள்.) மருங்குல் தேய்ந்து ஒளிப்ப - இடையானது தேய்ந்து
மறையுமாறு, செம்பொன் வனம் முலை இறுமாப்பு எய்த - சிவந்த
பொன்னிறம் வாய்ந்த அழகிய கொங்கைகள் பணைத்து அண்ணாந்
திருக்கவும், கருங் குழல் கற்றை - கரிய கூந்தற்கற்றை, பால் நாள் கங்குலை
வெளிறு செய்ய - நள்ளிரவின் கருமையை வெண்ணிறஞ் செய்யவும், இரங்கும்
நல்யாழ் மென் தீஞ்சொல் இன் நகை எம்பி ராட்டிக்கு - ஒலிக்கின்ற நல்ல
யாழின் இசைபோன்ற மெல்லியஇனிய சொல்லையும் அனிய
புன்முறுவரையுமுடைய எம் பிராட்டியாருக்கு, அருங்கடி மன்றல் செய்யும்
செவ்வி வந்து அடுத்தது ஆக - அரிய திருமணம் செய்யும் பருவமானது
வந்து பொருந்த எ - று.

     ஒளிக்குமாறு இறுமாப் பெய்த. வனம் - தொய்யிலுமாம். கங்குலும்
வெளிறென்னுமாறு கரிதாக. யாழ் இரங்குந் தன்மையுடைய வென்றுமாம்.
கடிமன்றல் : ஒருபொரு ளிருசொல் : விளக்கமமைந்த மன்றலுமாம். (3)

     (இ - ள்.) பனிதரு மரி கொம்பு அன்ன பாவையை - குளிர்ந்த
சந்திரனை யேந்திய கொம்பினை ஒத்த பிராட்டியாரை, பயந்தாள் நோக்கி -
பெற்ற காஞ்சனமாலை பார்த்து, குனிதர நிறையப் பூத்த கொம்பு அன்னாய்க்கு
- வளையுமாறு நிறைய மலர்ந்த பூங்கொம்பினைப் போன்ற உனக்கு, கன்னி
கனி தரு செவ்வித்து ஆயும் - கன்னிப் பருவமானது முதிர்ந்த
செவ்வியுடையதாகியும், இன்னும் கடிமணப் பேறு இன்று என்னா - இன்னமும்
திருமணமாகிய பேறு கூடிற்றில்லையே என்று, துனிதரு நீரளாகிச்