எனச் சிலப்பதிகாரத்து வருதலுங் காண்க. நிம்ப அலங்கல் எனக் கூட்டுக. மூன்றாமடியில் முரண் என்னும் அணியமைந்துள்ளது. (18)

     (இ - ள்.) மறை பல முகம் கொண்டு ஏத்தி - வேதங்கள் பல
முகங்களால் துதித்தம் (காணமாட்டாமையின்), வாய் தடுமாறி எய்ப்ப - வாய்
தடுமாறி இளைக்குமாறு, நிறை பரம்பரை நீ எங்கும் நிறைந்த சிவசத்தியாகிய
நீ, எங்கள் நிருபர்கோன் மகளாய் - எம் வழித்தோன்றலாகிய மன்னர்
மன்னனாம் மலயத்துவச பாண்டியனுக்குத் திருமகளாய் வந்து, வையம்
முறைசெய்து - பூமியில் செங்போலோச்சி, மாசு தீர்ப்பாய் - குற்றத்தைப்
போக்குகின்றாய் (அதுபோல), அடியனேன் முகத்து மாசும் குறை என -
அடியேனுடைய முகத்திலுள்ள களங்கத்தையும் ஒழித்தருள் என்று, நிழற்றும்
திங்கள் கொள்கைபோல் - நிழலைச் செய்கின்ற சந்திரனது கொள்கை போல,
கவிகை காப்ப - வெண் கொற்றக் குடை நிழல் செய்யவும் எ - று.

     பலமுகம் - பல சாகைகள். எங்கள் என ஒருமையிற் பன்மை கூறினார்;
அயன் படைப்பிலும், திருமால் உளத்திலும், அங்கியின் முகத்திலும், அத்திரி
விழியிலும், பாற்கடலிலும் தோன்றிய ஐவகை மதியையுங் கருதிச்
சொன்னாரெனினுமாம். பாண்டியர் திங்கண் மரபின ராகலின் இங்ஙனங்
கூறினார். நிழற்றுவதாகிய கொள்கை : இது தற்குறிப்பேற்றவணி. (19)

     (இ - ள்.) வெம் கதிர் வியாழச் சூழ்ச்சி மேம்படு சுமதி என் போன்
- விரும்பும் ஒளியினையுடைய வியாழனது சூழ்ச்சியினும் சிறந்த
சூழ்ச்சியினையுடைய சுமத என்னும் முதலமைச்சன், அம் கயல் நோக்கிமான்
தேர்க்கு - அழகிய கயல்போலுங் கண்களையுடைய பிராட்டியாரின் தேருக்கு,
அணித்து ஒரு தடம் தேர் ஊர்ந்து - அணித்தாக ஒரு பெரிய தேரினைச்
செலுத்தி, நங்கைதன் குறிப்பு நோக்கி - அப்பிராட்டியாரின் குறிப்பினை
ஆராய்ந்து நால் பெரும்படையும் செல்ல - பெரிய நால்வகைச் சேனைகளும்
செல்லுமாறு, செம் கையில் பிரம்பு நீட்டி - சிவந்த கையிலுள்ள பிரம்பினாற்
சுட்டிக் காட்டி, சேவகம் செலுத்திச் செல்ல - சேவகத்தைச் செலுத்திச்
செல்லா நிற்பவும் எ - று.

     அணித்து - அணியதாக. வெம்மை - விருப்பம். வியாழன் - பிருகற்
பதி; தேவர்க்கு அமைச்சுப் பூண்டவ னென்பதுபற்றி யெடுத்துக் கூறினார்.
சூழ்ச்சியினும் என உருபும் உம்மையும் விரிக்க சேவகம் - வீரமும்,
பணியுமாம். இங்கே படையினைப் பணிகொள்ளுதலாகிய வீரமும்,
பிராட்டிக்குப் பணிசெய்தலாகிய தொண்டும் கொள்க. (20)