(இ - ள்.) அலகு இல் - அளவில்லாத, நால் கருவிச் சேனை ஆழ்
கடல் அனைத்தும் - நால்வகைப் படையாகிய கடல் முழுதையும், தன்
போல் - தன்னைப்போல், மலர்தலை உலகம் அன்றி - பரந்த
இடத்தினையுடைய இந்நிலவுலகையல்லாமல், மகபதி உலகம் ஆதி உலகமும்
- இந்திரன் உலகம் முதலிய உலகங்களிலும், பிறவும் செல்ல -
பிறவிடங்களினும் செல்லுமாறு, உலப்பு இலா வயிது ஆக்கி - அழியாத
வலிமையுடையதாகச் செய்து, திலக வாள் நுதலாள் - திலகமணிந்த
ஒளிபொருந்திய நெற்றியையுடைய தடாதகைப் பிராட்டியார், மன்னர் திரு
எலாம் கவரச் செல்வாள் - அரசர்களின் செல்வங்களனைத்தையும் கொள்ளை
கொள்ளப் பேரவாராயினர் எ - று.

     சேனையைக் கருவியாக்கிக் ‘கருவிச்சேனை’ என்றார். தொகுதி யாகிய
சேனையுமாம். ஆழ் என்றது கடலுக்கு இயற்கையடை. தன் போல் செல்ல
எனக்கூட்டுக. அனைத்தும் என்பதை ஒருமையாக்கி ‘வலியது’ என்றார். (21)

     (இ - ள்.) கயபதி ஆதி ஆய - கயபதி முதலாகிய, வடபுலக் காவல்
வேந்தர் - வடநாட்டைக் காக்கும் மன்னர்களின், புயவலி அடங்க வென்று -
தோள்வலி கெடுமாறு (அவர்களை) வென்று, புழைக்கை மான் -
தொளையினையுடைய கையையுடைய யானைகளையும், புரவி -
குதிரைகளையும், மான்தேர் - குதிரைகள் பூட்டிய தேர்களையும், பயல் மதி
நுதல் - அரைமதியை ஒத்த நெற்றியையும், வேல் உண்கண் - வேலை
யொத்த மையுண்ட கண்களையுமுடைய, பாவையர் ஆயமோடு மகளிர்
கூட்டத்துடன், நயம் மலி திறையும் கொண்டு நலம் நிறைந்த திறைப்
பொருளையும் ஏற்றுக்கொண்டு, திசையின்மேல் நாட்டம் வைத்ததாள் -
திசை காப்பாளர்மேல் போருக்கு எழ எண்ணினார் எ - று.

     கயபதி - கஜபதிகள் : வடநாட்டி லாண்ட ஓர் அரச வமிசத்தினர்;
யானைமிக்குடையானெனப் பொதுப் பெயருமாம். பயல் : பையல் என்பதன்
மரூஉவாகக் கொண்டு, குழவி மதியென உரைத்தல் வேண்டும்; அமுதமாகிய
பயனுமாம். திறையும் என்றமையால் மேற் சொல்லியன கவர்ந்தவை. (22)