(இ - ள்.) என்ற நாதன்மேல் - என்று கூறியருளிய தலைவனிடத்தில்,
அன்பையும் உயிரையும் இருத்தி - தம் அன்பையும் ஆவியையும் வைத்து,
ஆயம் சூழ - மகளிர் கூட்டம் புறஞ்சூழ, குன்றம் அன்ன தேர் மேற்கொடு
- மலையினை ஒத்த தேரின்மேல் ஏறியருளி, தூரியம், தூரியம் குரை கடல்
என ஆர்ப்ப - வாத்தியங்கள் ஆர்க்கின்ற கடலினைப்போல ஒலிக்க, நின்ற
தெய்வமால் வரைகளும் - இடை நின்ற தெய்வத்தன்மை பொருந்திய
பெரியமலைகளையும், புண்ணிய நீத்தமும் நீத்து ஏகி - புண்ணிய நதிகளையுங்
கடந்து சென்று, மதிக்குல விளக்கு அன்னாள் - திங்கள் மரபிற்கு விளக்குப்
போல்பவராகிய தடாதகைப் பிராட்டியார், மன்றல் மா மதுராபுரி
அடைந்தனள் - மணம் மிக்க பெருமையுடைய மதுரையம்பதியை அடைந்தார்
எ - று.

     மன்றல் - மலர் மணமும், கல்யாணமும் ஆம். குலத்தை விளங்கச்
செய்தலின் விளக்கன்னாள் என்றார். (46)

     (இ - ள்.) மங்கை நாயகி - மங்கையர்க் கரசியாகிய பிராட்டியார்,
மங்கலம் எதிர்கொள வந்து - எட்டு மங்கலமும் ஏந்தியவர்கள் எதிர்
கொள்ள வந்து, வான் இழி செல்வம் பொங்குமாளிகை புகுந்தனள் ஆக -
வானுலகத்தி னின்றும் உய்த்த செல்வம் மிக்க திருமாளிகையிற்
புகுந்தருளினார்; மேல் - பின், புதுமணத்திறம் தீட்டி எங்கும் ஓலை உய்த்து
- கடிமணச் செயலை எழுதி எவ்விடங்கட்கும் ஓலை அனுப்பி, அமைச்சர்
மங்கல வினைக்கு இயைவன அமைக்கின்றார் - மந்திரிகள் மண விழாவுக்குப்
பொருந்துவன சமைப்பவர்கள், அம் கண் மா நகர் எங்கணும் - அழகிய
இடத்தினையுடைய பெரிய நகர் முழுதும், கடி முரசு ஆனைமேல்
அறைவித்தார் - மணமுரசினை யானையின்மே லேற்றிச் சாற்றுவித்தார்கள்
எ - று.

     வான் இழிசெல்வம் - தாம் முன்பு வென்று கைப்பற்றிக் கொணர்ந்த
செல்வம். ஆக : அசை; புகுந்தருள என எச்சமுமாம். அமைக்கின்றாராகிய
அமைச்சரென்க. யானை, ஆனையெனத் திரிந்தது. (47)