(இ - ள்.) மங்கலம் என்று என வினவுவார் - திருமணம் எப்பொழுது
என்று (ஒருவரை ஒருவர்) கேட்பார்கள்; வரும் மதிநாள் என - வருகின்ற
திங்கட் கிழமை என்று, உரைசெய்வார் தங்களை - கூறுகின்றவர்களை,
ஒல்லை தழீஇக்கொள்வார் - விரையத் தழுவிக் கொள்பவர்களாய், தாங்கரும்
ஓகை தலைக் கொள்வார் - தாங்குதற்கரிய மகிழ்ச்சி மீக்கொள்வார்கள்;
திங்களின் எல்லையும் ஆறுநாள் - அம் மதி நாள் வருமளவு ஆறுநாள்
(ஆயினும் அவற்றை), ஆறு உகம் என்று செலுத்துவார் - ஆறு
யுகங்களைப்போலக் கழிப்பார்கள்; நங்கை அருங்கடி காணவோ - நம்
பிராட்டியாரின் திருமண விழாவைக் காணுதற் பொருட்டோ, நமக்குத்
தோள்கள் துடித்தன என்பார் - நமக்குத் தோள்கள் துடித்தன என்று
கூறுவார்கள் எ - று.

     உரை செய்வார்; தாங்கள் ஒருவரை யொருவர் தழுவிக் கொள்வார்,
எனப் பிரித் துரைத்தலுமாம். ஓகை - உவகை. உடன்காணும் அவாவினால்
ஒருநாள் ஒரு யுகம் போலாயிற்று என்றார். தோற் துடித்தல் ஆடவர்க்கு
வலமும் மகளிர்க்கு இடமும் ஆம். பிராட்டி இறைவனைச் சந்தித்து
மீண்டநாளும் திங்கட்கிழமையெனக் கொள்க. (50)

     (இ - ள்.) பித்திகை வெள்ளை புகுக்குவார் - சுவர்த்தலங்களைச்
சுண்ணத்தாற் புதுப்பிப்பார்கள்; உறுவார்களும் பெட்புற - (யாவரும்)
விரும்புகின்ற சிற்பநூல் வல்லாரும் விரும்புமாறு, சித்திர பந்தி நிறுத்துவார் -
சித்திர வரிசைகளை நிற்பிப்பார்கள்; தெற்றிகள் குங்குமம் நீவுவார் -
திண்ணைகளைக் குங்குமக் குழம்பால் மெழுகுவார்கள்; வேதி -
அத்திண்ணைகளில், வித்திய பாலிகை - முளைத்த பாலிகைகளையும்,
மென்தழை விரிதலை நீர் நிறை பொன் குடம் - மெல்லிய (மாந்) தழை
விரிந்த தலையையுடைய நீர் நிரம்பிய பொன்னாலாகிய பூரண
கும்பங்களையும், பத்தியின் நிரப்புவார் - வரிசைப்பட வைப்பார்பள்;
தோரணம் வாயில் பரப்புவார் - தோரணங்களை வாயிலிற் கட்டுவார்கள்
எ - று.

     வித்திய - விதைத்த; முளை தோன்றிய. (51)