மதத்தோடு கலந்த சந்தனக் குழம்பை அப்பி, தாது அவிழ் புது மந்தாரப்
பொன் மலர் சாத்தி - மகரந்தத்தோடு விரிந்த புதிய மந்தாரத்தின்
பொன்னிறம் வாய்ந்த மலர்களைச் சூட்டி, வேறு நின்று - ஒரு சிறை ஒதுங்கி
நின்று, சென்னி மீது இரு கரங்கள் கூப்பி - முடியின் மேல் இரண்டு
கைகளையும் குவித்து, இதனைச் சொன்னாள் - இதனைக் கூறுகின்றாள் எ-று.

     நீவதல் - துடைத்தல். இரு கரங்களும் என்னும் உம்மை தொக்கது.
வேறு நின்று - ஒதுங்கி நின்று. இதுவென்றது மேல் வருவதனை. (149)

     (இ - ள்.) அருமையால் அடியேன் பெற்ற அணங்கினை - அரிய
தவத்தால் அடியாளாகிய யான் பெற்ற தெய்வக் கன்னியை, வதுவை செய்து,
திருமணம் செய்து, இ திருநகர்த் திருவும் கன்னித் தேயமும் - இந்த அழகிய
நகரின் செல்ளத்தையும் கன்னி நாட்டையும், கைக் கொண்டு ஆள்க என்று
உரை செய்தாள் - பெற்று ஆள்வீராக என்று கூறி வேண்டினாள்; அதற்கு
நேர்வார் மருகனார் - அதற்கு உடன்படுவாராகிய மருமகனார், உள் நகை
உடையாரகி - புன்னகை உடையவராகி, இயங்கள் ஆர்ப்ப வதுவை
மண்டபத்தைச் சார்ந்தார் - இயங்கள் ஒலிக்கத் திருமண மண்டபத்தை
அடைந்தார் எ - று.

     ஆள்கென்று அகரந் தொக்கது. நேர்வாராகிய மருமகனாரென்க.
மருமகனார் நேர்வாராய் எனவுரைத்தலுமாம். நேர்தற் குறிப்பைப்
புலப்படுத்தினாரென்பார் 'உண்ணகை யுடையராகி' என்றார். (150)

     (இ - ள்.) நிருத்தன் - இறைவன், அருத்தம் நால் மறைகள் ஆர்ப்ப -
பொருளமைந்த நான்கு மறைகளும் ஒலிக்க, மணி அரித்தவிசில் ஏறி ஆங்கு
இருந்து - இரத்தின சிங்காதனத்திலேறி வீற்றிருந்து, சூழ நின்ற - சுற்றிலும்
நின்ற, மால் அயனை - திருமாலையும் பிரமனையும், ஏனை உருத்திர
ஆதியரை - மற்றை உருத்திரர் முதலானவரையும், பின்னும் ஒழிந்த
வானவரை - மற்றும் எஞ்சிய தேவரையும், தத்தம் திருத்தகு தவிசில் மேவத்
திருக்கடை நாட்டம் வைத்தான் - அவரவர்க்கமைந்த அழகு பொருந்திய
ஆதனங்களில் இருக்குமாறு திருக்கடைக்கண் செய்தருளினான் எ - று.

     ஆங்கு : அசை. சிறப்பு நோக்கி 'உருத்திராதியரை' யென்றும்,
'ஒழிந்த வானவரை' யென்றும் பிரித்தோதினார். கடைநாட்டம் வைத்தல் -
கடைக்கணித்தல். (151)