(இ - ள்.) ஒல்கினள் மெல்ல ஒதுங்கினள் - அசைந்து மெல்ல
ஒதுங்கி, அன்பு பில்கி இருந்த பிரான் அருகு எய்தி - (தம்மேல்) அன்பு
நிறைந்திருந்த இறைவன் பக்கலிற் சென்று, மெல்கி - மென்மைக் குணம்
நிரம்பி, எருத்த மிசைத்தலை தூக்கி - பிடரின் மேல் தமது திருமுடியை
வைத்து, புல்கிய காஞ்சி புலம்ப இருந்தாள் - பொருந்திய காஞ்சி ஒலிக்க
அமர்ந்தருளினார் எ - று.

     ஒதுங்கினள் - நடந்தாள் : அநுவாதம். நாணத்தால் மென்மையுற்று
இருக்கும் பொழுது காஞ்சியொலித்தல் கூறினார். முன்னுள்ள முற்றுக்கள்
எச்சமாயின. (172)

     (இ - ள்.) அல்பக இமைக்கும் செம்பொன் அரதன பீடத்து உம்பர்
- இருள்கெட ஒளி வீசும் செம்பொன்னாலாகிய மணிகள் இழைத்த தவிசின்
மேல், பொற்பு அகலாத காட்சிப் புனிதனோடு - பொலிவு நீங்காத
தோற்றத்தையுடைய தூய இறைவனோடு, இருந்த நங்கை - இருந்த
பிராட்டியார், எரி கதிர் - ஒளியியையுடைய சூரியன், எல் பகல் வலம்
கொண்டு ஏகும் - இரவும் பகலும் வலமாகப் போகப் பெற்ற, வரையின்
உச்சி - மேரு மலையின் உச்சியில், கற்பக மருங்கில் - கற்பகத் தருவின்
பக்கத்திலே, பூத்த காமருவல்லி ஒத்தாள் - மலர்ந்த அழகிய கொடியினை
ஒத்தார் எ - று.

     எற்பகல் என்பதற்கு ஒளியையுடைய சூரியன் என்று பொருள் கூறி,
எரி கதிர் என்பதனை வரைக்கு அடையாக்கலுமாம். பூத்த -
பொலிந்தவென்றுமாம். பொற்பீடத்திற்கு மேருவும், இறைவற்குக் கற்பகமும்,
இறைவிக்கு வல்லியும் உவமம். காமவல்லியெனப் பெயருமாம். (173)

     (இ - ள்.) அண்ணலும் உலகம் ஈன்ற அம்மையும் இருந்தது -
சிவபெருமானும் உலகங்களையெல்லாம் பெற்றருளிய அன்னையாகிய
பிராட்டியும் வெவ்வேறு வடிவங் கொண்டிருந்தது, பண்ணும் இன் இசையும்
- பண்ணும் இனிய இசையும், நீரும் தண்மையும் - நீரும் தட்பமும், பாலும்
பாலில் நண்ணும் இன்சுவையும் - பாலும் அப்பாலின்கட் பொருந்திய இனிய
சுவையும், பூவும் நாற்றமும் - பூவும் மணமும் மணியும் அம் கேழ்
வண்ணமும் - மணியும் அழகிய ஒளியும் (ஆகிய இவைகள்), வேறு வேறு
வடிவு கொண்டு இருந்தால் ஒத்தது - வேறு வேறாக வடிவங்கொண்டு
ஓரிடத்திலிருந்த தன்மையைப் போன்றது எ - று.