(இ - ள்.) மாக் கூடி முளரிவாணன் - பெருமை பொருந்திய
மணமுடைய தாமரை மலரில் வசிக்கும் பிரமன், மைந்தரோடு ஒருங்கு
வைகி - புதல்வர்களோடு ஒரு சேர இருந்து, நாக்களின் நடுநா ஆர - ஏழு
நாக்களில் நடு நாவால் சுவையறியுமாறு, துடுவையால் நறுநெய்
ஆர்த்திவாக்கிட - சுருக்கு சுருவங்களால் நறியநெய்யை நிரப்பி வார்க்க,
தெய்வச் செந்தீ - தெய்வத் தன்மையுடைய சிவந்த தீயானது, ஆர மாந்தி -
நிரம்ப உண்டு, வலம் சுழித்து - வலமாகச் சுழித்து, அகடு வீங்கி - வயிறு
நிரம்பி, தேக்கிடும் ஒலியின் ஆர்த்து - தேக்கெறியும் ஒலி போல ஒலித்து,
நிமிர்ந்தது - மேலெழுந்தோங்கியது எ - று.

     வாணன் - வாழ் நன். மைந்தர் இவரென்பது புராண வரலாற்றுள்
உரைக்கப்பட்டது. ஆர்த்தி - நிறையச் செய்து. தேக்கெறிதலை இப்பொழுது
ஏப்பமிடல் என்பர். செந்தீத் தெய்வம் என மாற்றுதலுமாம். (184)

     (இ - ள்.) சுற்றும் நால் மறைகள் ஆர்ப்ப - நான்கு புறத்திலும் நான்கு
வேதங்களும் ஒலிக்கவும், தூரியம் சங்கம் ஏங்க - இயங்களும் சங்கங்களும்
ஒலிக்கவும், கற்ற நான் முகத்தோன் - வேதங்களை உணர்ந்த பிரமன், நூல்
கரைந்த வாற்றால் - வேத சிவாகமம் கூறிய முறையால், வேள்விச் சடங்கு
முற்ற - திருமணச் சடங்குகளைக் குறைவின்றி முடிக்க, பற்று இலார்க்கே
வீடு அருள் பரமயோகி - இரு வகைப் பற்றும் அற்றவர்க்கே வீட்டின்பத்தை
அருளும் பரமயோகியாகிய இறைவன், மங்கல நாண் சாத்தி - திருமங்கல
நாணைப் பூட்டி, முழுது உலகு ஈன்றாள் செங்கை பற்றினன் - எல்லா
உலகங்களையும் பெற்றருளிய பிராட்டியாரின் சிவந்த திருக்கரங்களைப்
பற்றியருளினான் எ - று.

     முற்றுவிக்க என்பது முற்றவென நின்றது. இறைவன் யோகியாயிருத்தல்
உயிர்களுக்கு முத்தியளித்தற் பொருட்டன்றித் தனக்கொரு பயன்
கருதியன்றென்பார் 'வீடருள் பரமயோகி' என்றார்;

எனச் சிவஞான சித்தியார் கூறுவது காண்க. உலகங்களையெல்லாம்
ஈன்றவளை மணந்தானென்பதும் பற்றற்றவர்க்கே அருளும்
பரமயோகியாயுள்ளவன் ஒருத்தி செங்கை பற்றினனென்பதும் முரணாகி அணி
செய்தல் காண்க. கை பற்றுதல் - பாணிக்கிரகணம். ஏகாரம் பிரிநிலை. (185)