(இ - ள்.) விண் தவழ் மதியம் சூடும் சுந்தர விடங்கப் புத்தேள் -
வானின் கண் தவழும் சந்திரனையணிந்த பேரழகனாகிய சோம சுந்தரக்
கடவுள். கொண்டது ஓர் வடிவுக்கு ஏற்ப - கொண்டருளிய ஒப்பற்ற
திருக்கோலத்திற்குப் பொருந்த, குருதி கொப்பளிக்கும் சூலம் - உதிரம்
கொப்பளிக்கும் சூலப்படையையுடைய, திண் திறல் சங்கு கன்னன் முதல்
கணத்தேவர் தாமும் - மிகுந்த வலியையுடைய சங்கு கன்னன் முதலான
சிவகணத்தவர்களும், பண்டைய வடிவம் மாறி - முன் உருவம் நீங்கி (அரசர்
பணி செய்தற் கேற்ற உருக்கொண்டு), பார்த்திவன் பணியில் நின்றார் -
அம்மன்னன் ஏவலில் நின்றார்கள் எ - று.

     சுந்தர விடங்கம், திண்டிறல் என்பன ஒரு பொருட் பன்மொழிகள்.
கணமாகிய தேவர். (195)

     (இ - ள்.) உலகம் காக்கும் மன்னவர் - உலகத்தைக் காவல் பூண்ட
வேந்தர்கள், சிவனைப் பூசை செய்வது - சிவபெருமானைப் பூசிப்பது, மறை
ஆறு என்று சொன்னது - வேத நெறி என்று தான் திருவாய்
மலர்ந்தருளியதை, மன்னர் எல்லாம் துணிவது பொருட்டு - அரசரனைவரும்
துணிந்து மேற்கொள்ளுதற் பொருட்டு, தென்னவர் வடிவம் கொண்ட சிவபரன்
தானும் - பாண்டியர் திருக்கோலங் கொண்ட இறைவனும், அ நகர் -
அந்நகரில், நடுவூர் என்று ஓர் அணி நகர் சிறப்பக் கண்டான் - நடுவூர்
என்று சொல்லப்படும் ஓர் அழகிய நகரை மேன்மைப்பட ஆக்கினான் எ-று.

     கோலம் பாண்யரனைவர்க்கும் பொதுவாகலின் 'தென்னவர்' எனப்
பன்மை கூறினார். வேத நெறியென்று வேதத்திற் சொன்னதென்க. செய்வது,
துணிவது : தொழிற் பெயர்கள். (196)