எனக் கூறப்பட்டிருத்தலுங் காண்க. நடுவும் முடிவுங் கூறினமையின்
முதலுங் கொள்க. (21)

     (இ - ள்.) அடியரேம் பொருட்டு - அடியேங்கள் நிமித்தமாக,
வெள்ளி அம்பலத்து ஆடல் போற்றி - வெள்ளியம்பலத்தின்கண்
ஆடப்பெறும் திருக்கூத்துக்கு வணக்கம்; பொடி அணி தடம் தோள்
போற்றி - திருநீறு தரித்த பெரிய திருத் தோள்களுக்கு வணக்கம்; புரிசடை
மகுடம் போற்றி - முறுக்கமைந்த சடைமுடிக்கு வணக்கம்; கடி அவிழ் மலர்
மென் கூந்தல் கயல்விழி பாகம் போற்றி - மணத்தொடு மலர்ந்த மலர்களை
அணிந்த மெல்லிய கூந்தலையுடைய அங்கயற்கண்ணம்மையார்
அமர்ந்திருக்கும் இடப்பாகத்துக்கு வணக்கம்; நெடியதற் பரமானந்த
நிருத்தனே போற்றி போற்றி - என்றும் அழியாத மேலான சிவானந்தத்
திருக்கூத்தினை உடையவனே நினக்கு வணக்கம் வணக்கம் எ - று.

     அடியரேம் : படர்க்கை விகுதி கெடாது தன்மை விகுதியும் பெற்றது.
தற்பரம ஆனந்தம் - மேலாகிய சிவானந்தம். (22)

     (இ - ள்.) என்று நின்று ஏத்தினான் - என்று வணங்கி நின்று
துதித்தான்; வெள்ளி மன்றுள் நின்று ஆடாநின்ற மறைமுதல் -
வெள்ளியம்பலத்துள் நின்று திருக்கூத்தாடும் வேத முதல்வனாகிய இறைவன்,
பின் - பின்பு, இருவரை நோக்கி கருணை கூர்ந்து - பதஞ்சலி
வியாக்கிரபாதர் இருவரையும் பார்த்துக் கருணை மிகுந்து, நன்று - நல்லது;
நீர் வேட்டது என்னென்று அருள் செய - நீவிர் விரும்பியது யாதென்று
வினவியருள, நாதன் பாதம் துன்றும் மெய் அன்பில் - அவ்விறைவன்
திருவடியில் மிக்க உண்மை யன்பினால், தாழ்ந்து தொழுது நின்று இதனைச்
சொல்வார் - விழுந்து வணங்கி நின்று இதனை வேண்டுவாராயினர் எ - று.

     நன்று என்றது உவப்பின் குறிப்பு; நன்று வேட்ட தென்னலுமாம். (23)

     (பா - ம்.) * நெடியநற் பரமானந்த; நெடியவ பரமானந்த.