(இ - ள்.) அனையன் ஆகியும் - அங்ஙனம் குடித்தலையுடை
யனாகியும், நீர் நசை ஆற்றலன் வருந்தும் வினையனாகி - நீர் வேட்கையைப்
பொறாதவனாகி வருந்துந் தன்மையுடையவனாய், வான் நதிச் சடை வேதியன்
பாதத்து இனைய - சிறந்த கங்கையாற்றினையுடைய சடையையுடைய
அந்தணனாகிய சோமசுந்தரக் கடவுளின் திருவடிகளில் வீழ்ந்து வருந்த,
நாதனும் - அவ்விறைவனும், தன் திருமுடியின் மீது இருக்கும் - தனது
திருமுடியின்கண் இருக்கின்ற, நனைய நாள் மலர் ஓதியைப் பார்த்து ஒன்று
நவில்வான் - தேனையுடைய புதிய மலரையணிந்த கூந்தலையுடைய
கங்கையை நோக்கி ஒன்று கூறுவான் எ - று.

     ஆற்றலன் : எச்சமாயிற்று. வினை - ஈண்டுத் தன்மை. பாதத்தில்
விழுந்து என விரிக்க. நனைய : குறிப்புப் பெயரெச்சம். நீர் வேட்கையைத்
தணிக்கவல்லவனென்பது தோன்ற 'வானதிச்சடை வேதியன்' என
அபிப்பிராயத்தோடு கூடிய விசேடணந் தந்தமையின் கருத்துடை யடையணி. (8)

     (இ - ள்.) தேங்கும் நீர் திரை மாலிகைச் செல்வி - ததும்புகின்ற
நீரினையும் அலை மாலையினையுமுடைய நங்காய், நீ இந்த வாங்கு
நீர்த்தடம்புரிசை சூழ் மதுரையின் மாடு - நீ இந்த வளைந்த அகழியும் பெரிய
மதிலும் சூழ்ந்த மதுரைப் பதியின் அருகில், ஓர் ஓங்கு நீத்தமாய் ஒல்லென
வருதி என்று உரைத்தான் - ஒரு பெரிய வெள்ளமாக விரைந்து வருவாய்
என்று கட்டளையிட்டருளினான்; நீங்கு நீர்த் திருமாது - உடன்
சடையினின்றும் நீங்கா நின்ற தெய்வத் தன்மையையுடைய கங்கா தேவி,
அவண் ஒரு மொழி நிகழ்த்தும் - அங்கு ஒரு வார்த்தை கூறுவாள் எ - று.

     வாங்கு நீர் - வளைந்த தன்மையெனலுமாம். (9)

     (இ - ள்.) எம்பிரான் - எம் பெருமான், அன்றும் - அக்காலத்தும்,
ஆணையால் - நம் கட்டளையால், நீ பகீரதன் பொருட்டு சென்று - நீ