யாதோ என்க; இவை யெல்லாமும் காரண மாகல் வேண்டுமென்பது குறிப்பு.
உள்ளக் கருணையென இயையும். தோற்றம் என்பது அதன் காரணத்திற்
காயிற்று. போல் என்பது போலும் எனப் பெயரெச்சப் பொருட்டு (20)

     (இ - ள்.) இந்த திருமகன் - இச்செல்வப் புதல்வனின் (தோற்றம்).
தருமம் மாதவத்தின் பேறோ - அறத்தினது பெரிய தவத்தின் பயனோ,
அருத்தம் மாதவத்தின் பேறோ - பொருளினது பெருந் தவத்தின் பயனோ,
பெருமை சால் காமம் நோற்ற பெருந்தவப் பேறோ - பெருமை மிக்க
இன்பமானது புரிந்த பெரிய தவத்தின் பயனோ, எய்தற்கு அருமையாம் வீடு
நோற்ற அருந்தவப் பேறோ - அடைதற்கு அரிய வீடானது இயற்றிய அரிய
தவத்தின் பயனோ, என்று தம்மில் வினாய் - என்று தம்முள்
(ஒருவருக்கொருவர்) வினாவிக்கொண்டு, மகிழ் சிறப்ப சென்றார் - மகிழ்ச்சி
மிகச் சென்றார்கள் எ - று.

     இத் திருமகன் உறுதிப் பயன்களாகிய அறம் முதலிய நான்கனையும்
நிலவச் செய்வானென்பது கருதி அவற்றின் தவப் பேறோ என்றா ரென்க.
பெருமை சால் காமம் - ஒத்த அன்புடைய தலைவனும் தலைவியும் ஈருடம்பிற் கோருயிரனையராய்க் கூடி நுகரும் இன்பம். மேற் செய்யுளில் உரைத்தாங்கும்
உரைத்துக் கொள்க. இவ்விரு செய்யுளிலும் ஓகாரங்கள் வினாப் பொருளன.
வினாவி யென்பது வினாய் எனத் திரிந்தது. (21)

     (இ - ள்.) அவ்வவர் மனைகள் தோறும் - அவரவர்கள் இல்லங்கள்
தோறும், மங்கல அணிகளாக - மங்கல விழாவாகக் கொள்ளுதலால்,
கௌவை மங்கலங்கள் ஆர்ப்ப - (யாவர் மனையிலும்) ஒலியை யுடைய
மங்கல வாத்தியங்கள் முழங்கவும், கடி நகர் எங்கும் - காவலையுடைய
மதுரைப்பதி முற்றும், பொங்க நெய் விழா எடுப்ப - சிறக்க எண்ணெயாட்டு
விழா எடுக்கவும், கேள்வி நிரம்பிய மறையோர்க்கு ஈந்த - கேள்வியில் வல்ல
அந்தணர்களுக்குக் கொடுத்த, தெய்வ மா தான நீத்தம் - தெய்வத்தன்மை
பொருந்திய பெரிய தான நீரின் பெருக்கு, திரைக்கடல் மடுத்தது -
அலைகளையுடைய கடலிற் புகுந்தது எ - று.

     மங்கல வணிகளாகக் கொள்ளப் படுதலால் என்க. ஆர்ப்பு எனப்
பாடமோதி, ஆர்ப்புப் பொங்க என முடிப்பாரு முளர். நெய்விழா -

     (பா - ம்.) * மங்கலங்க ளார்ப்பு.