பன்னிரு ஆண்டு - பன்னிரண்டு ஆண்டுகள் வரை, வான் சுருக்கும் என்று
நூல்கள் பேசின - மழையில்லை என்று நூல்கள் கூறின (ஆதலால்), மாரி
பெய்விப்போன் சென்று கேண்மின் - மழையைப் பெய்விப்போனாகிய
இந்திரனிடத்திற் சென்று அவனைக் கேளுங்கள் எ - று.

     காய் சினம் - சுடுகின்ற சினமுமாம்; பரிதியின் வெம்மையைச்
சினமென்று கூறுதல் கவிமரபு. ஆதித்தன் செவ்வாய்க்கு முன்செல்ல வென்று
கூறுதற்கும் சொற்கிடக்கை இடந்தரும். தானவர்க்குக் குருவாகலின் ‘தேசிகன்’
என்றார். மிகவும் பின்னே தள்ளிச் செல்லுதலால் என்பது கருத்து; வெள்ளி
மழைக் கோளாதல் உணர்க. கேண்மின் - பெய்விக்கவேண்டுமெனக்
கேளுங்கள். (4)

     (இ - ள்.) என்றவன் எதிர் - என்று கூறிய அகத்திய முனிவனெதிரே,
யாம் எவ்வாறு ஏகுதும் என்றார் - யாங்கள் அங்கு எங்ஙனம் செல்வோம்
என்று வினாயினர்; ஐந்தும் வென்றவன் - (அதற்கு) ஐம்புலன்களையும்
வென்றவனாகிய குறுமுனிவன், நீர் சோமவார விரதம் நோற்று - நீவிர்
சோமவார விரதம் அனுட்டித்து, வெள்ளி மன்றவன் அருளைப் பெற்று -
வெள்ளியம்பலவாணன் திருவருளைப் பெற்றுக் கொண்டு, வான் வழிச்
சென்மின் என்று - வானின் வழியே செல்வீராக வென்று, அ குன்ற வன்
சிலையான் நோன்பின் விதியினை கூறுகின்றான் - அந்த மேருமாலையாகி
வலிய வில்லையுடைய சிவபிரானது விரதத்தின் விதியினைக் கூறுகின்றான்
எ - று.

     ஐந்து : தொகைக் குறிப்பு. சிலையானாகிய அவனது என்க. (5)

     (இ - ள்.) உத்தம வானோர்தம்முள் ஈசன் உத்தமன் ஆகும் - மிக்க
மேன்மையுடைய தேவர்களுள் சிவபிரான் மேலோனாவன், உத்தம
சத்திமாருள் உருத்திராணி உத்தமி - மிக்க மேன்மையுடைய சத்திகளுள்ளே
உமாதேவியார் மேன்மையுடையராவர், உத்தம விரதம் தம்முள் - மிக்க
மேன்மையுடைய விரதங்களுக்குள்ளே, திங்கள் நோன்பு உத்தமம் -
சோமவார விரதம் மேன்மையுடையது. என்று உத்தம மறை நூல் ஆதி
உரைக்கும் - என்று மிக்க மேன்மையுடைய வேத முதலிய நூல்கள்
கூறாநிற்கும் : இச்சோமவாரம் - இந்தச் சோமவார விரதமானது எ - று.

     உத்தமம் - எல்லாவற்றிலும் சிறந்த தன்மை; மிக்க மேன்மை.
சோமவாரம் என்பது அடுத்த செய்யுளில் ‘தந்திடும் பயனில்’ என்பதனோடு
பொருந்தும். (6)