திருக்கோயில்களில் சிவலிங்கத்தைத் தொட்டுப் பூசித்தற்குரியார் ஆதி
சைவரே யென்பதும் வைதிகப் பிராமணர் முதலிய ஏனையோர்
உரியரல்லரென்பதும் சிவகாமநூற் கொள்கை;

என்னும் ஆளுடையநம்பிகள் விதந்தோதுதலுங காண்க. செய்தல் :
வியங்கோள். இவ் விரதம் நோற்கக் கடவர் என வருவித்துரைக்கப்பட்டது.
(21)

     (இ - ள்.) உச்சிப்போதில் ஊண் - உச்சிப் பொழுதில் உண்ணுதலும்,
இரவில் ஊண் - இரவிலுண்ணுதலும், இரண்டும் ஒருவுதல் - இரண்டு வேளை
உணவையும் நீக்குதலும், உறங்காது இருத்தல் - துயிலாதிருத்தலும், நால்
யாமமும் அர்ச்சனை உஞற்றுதல் என்ன - நான்கு சாமமும் அருச்சனை
புரிதலும் என்று , பொருவு இல் இவ் விரதம் ஐவகைத்து - ஒப்பற்ற
இவ்விரதமானது ஐந்து வகையினை யுடையது; கருதின் - ஆராய்ந்து
பார்க்கின், இவ்வைந்தும் - இவ்வைந்து வகையும், ஒன்று மிகவுஞ்
சிறந்ததாகும்; நோற்கும் வருடம் - நோற்கும் ஆண்டின் அளவு, ஒன்று
இரண்டு மூன்று பன்னிரண்டு வருடம் வாழ் நாள் அளவு - ஒன்றும
இரண்டும் மூன்றும் பன்னிரண்டும் ஆகிய ஆண்டினளவும் வாழ் நாளளவும்
ஆகும்; இவற்றுள் - இவற்றினுள் எ - று.

     உச்சிப் போதில் உண்டு இரவில் நீக்கலும், இரவில் உண்டு
உச்சிப்போதில் நீக்கலும் என்க. உறங்காதிருத்தல் அர்ச்சனை இவற்றுடன்
ஊணொருவுதலையுஞ் சேர்த்துக் கொள்க. ஒன்றினுக்கொன்று ஒன்றினொன்று :
வேற்றுமை மயக்கம். (22)