(இ - ள்.) குருவிந்தம் தரிப்பவர் பார் முழுதும் ஒரு குடை நிழலில்
குளிப்ப ஆண்டு - குரு விந்தத்தினை அணிகின்றவர் நிலவுலக முற்றும்
தமது ஒரு குடை நிழலின் கீழ்த் தங்க அரசாண்டு, திருவிந்தை உடன்
இருப்பர் - திருமகளோடும் வீரமகளோடுங் கூடியிருப்பர்; சௌகந்திகம்
தரிப்போர் - சௌகந்திகத்தினை அணிவோர், செல்வம் கீர்த்தி மருவு இந்தப்
பயன் அடைவர் - செல்வமும் புகழுமாகிய பொருந்திய இந்தப் பயன்களை
யடைவார்; கோவாங்கம் தரிப்போர் தம் மனையில் - கோவாங்கத்தினை
அணிவோரின் வீட்டில், பாலும் பெரு விந்தம் என சாலி முதல் பண்டமுடன்
செல்வப் பெருக்கும் உண்டாம் - பாலும் பெரிய விந்த மலையைப் போல
நெல் முதலிய பல பண்டங்களின் குவைகளோடு செல்வப் பெருக்கமும்
உண்டாகும் எ - று.

     நிழலின் கீழிருத்தலை 'நிழலிற் குளிப்ப' என்றார். திருவுடனும்
விந்தையுடனும் என்க. (42)

     (இ - ள்.) எள்ளியிடு குற்றம் எலாம் இகந்து - விலக்கப்பட்ட
குற்றங்களெல்லாவற்றினின்றும் நீங்கி, குணன் ஏற்று ஒளிவிட்டு இருள் கால்
சீத்துத் தள்ளிய - சிறந்த குணங்களைத் தன்னகத்தே கொண்டு ஒளி வீசி
இருளைப் பற்றறக் கெடுத்துப் போக்கிய, இ செம்பதும ராகமது புனை
தக்கோர் தம்பால் - இந்தச் சிவந்த பதுமராக மணியை அணிகின்ற
தக்கோரிடத்து, ஏனை தெள்ளிய முத்து உள்ளிட்ட பல் மணியும் வந்து
ஓங்கும் - மற்றைச் சிறந்த முத்து முதலிய பல மணிகளும் வந்து பெருகும்;
அதற்கு ஒப்ப - அதற்குப் பொருந்த, செய்யாளோடும் ஒள்ளிய நல்
செல்வம் -திருமகளோடும் புகழைத் தருவதாகிய நல்ல செல்வமும்,
நெடும்பாற்கடலின் ஓங்கும் - நெடிய பாற்கடலைப் போல வளரும் எ - று.