மகுடாபிடேக விழாவானது தொல்காப்பியத்தில் 'மண்ணு மங்கலம்'
என்னும் பெயராற் கூறப்படுகின்றது. புங்கவர் முறையால் நாமம் இசைப்ப
என்க. (91)

     (இ - ள்.) போர்மகட்கு உறையுள் ஆன புயத்து அபிடேகத் தென்னன்
- போருக்குரிய வீரமகளுக்கு இருப்பிடமாகிய தோளையுடைய அபிடேக
பாண்டியன், தேர் முதல் கருவித்தானைத் தெவ்வர் நீள் முடி எலாம் - தேர்
முதலிய கருவியாகிய படையினையுடைய பகைவருடைய நீண்ட முடிகள்
அனைத்தும், தன் வார்கழல் கமலம் சூட - தனது நெடிய வீரகண்டையை
யணிந்த அடியாகிய தாமரை மலரைச் சூட, மனுமுறை - மனுநூல் வழியே,
பைங்கூழ் காக்கும் கார் என - (மழை பொழிந்து) பயிரை ஓம்பும் முகில்
போல, கருணை பெய்து - கருணை சொரிந்து, வையகம் காக்கும் நாளில்
- உலகத்தைப் புரக்கும் நாளிலே எ - று.

     கருவித்தானை - கருவியாகிய தானை; இருபெயரொட்டு. கருணை
பெய்து என்பதற்கேற்ப மழை பொழிந்து என விரித்துரைக்க. தென்னன்
மனுமுறை காக்கு நாளில் என இயையும். (92)

     (இ - ள்.) தந்தை தன் காமக் கிழத்தியர் ஈன்ற தனயராய் - தன்
தந்தையின் காமக் கிழத்தியர் பெற்ற புதல்வராய், தனக்கு முன்னவராய் -
தனக்கு மூத்தவர்களாய், முந்தை நாள் அரசன் பொன் அறை முரித்து -
முன்னொரு நாளில் மன்னனது கருவூலத்தின் தாழை முரித்து, முடி முதல்
பொருள் கவர்ந்து - முடி முதலிய பொருள்களை வௌவி, உட்கும்
சிந்தையராகி - (அதனால்) அஞ்சிய சிந்தையையுடையராய், மறு புலத்து
ஒளித்த தெவ்வரை - வேற்றூரிற் புகுந்து ஒளித்த பகைவரை, சிலர்
கொடுவிடுப்ப - சிலர் பிடித்துக் கொண்டு வந்து விடுக்க, வந்தவர் கவர்ந்த
தனம் எலாம் - வந்தவராகிய அன்னோர் கவர்ந்த பொருளனைத்தையும், மீள
வாங்கினான் ஈர்ங்கதிர் மருமான் - திரும்பவும் வாங்கினான் குளிர்ந்த