(இ - ள்.) ஆன் பசலை கன்று - பசுவின் இளங்கன்றுகள், கறித்து
அருந்து - கடித்துத் தின்னுகின்ற, புல் குவை கழீ இ - புற்குவியல்களை
நீக்கி, கால் தொடர் - காலிற் கட்டிய கயிறானது, பரியத் தெறித்து அகன்று
- அறும்படியாகத் துள்ளி (அங்கு நின்றும்) நீங்கி, அயல் -
பக்கங்களிலுள்ள, மரகதம் - மரகதத்தாலமைந்த, சித்திரத்தெற்றி -
சித்திரங்களமைந்த திண்ணைகள், எறித்த பைங்கதிர்க் கொழுந்தை -
வீசுகின்ற பசிய ஒளிக்கொழுந்தை, நா வளைத்து - நாவை வளைத்து நீட்டி,
எட்டிப்பறித்து - எட்டிப்பிடுங்கி, மென்றுவாய் அசைப்பன - தின்று வாயால்
அசை போடுவன எ - று.

     கறித்து - கடித்து. கழீஇ - கழித்து. பறித்தும் என்று எப் பிரித்து,
பறிப்பேமென்று எனப் பொருள் கூறலுமாம். கொழுந்தையும் என்பதில்
உம் : அசை நிலை. (33)

     (இ - ள்.) சிறுகு கண்ணவாய் - சிறிய கண்களையுடையனவாய்,
காற்று எறி செவியவாய், காற்றை வீசும் செவிகளையுடையனவாய், பாசம்
இறுகு காலவாய் - சங்கிலி இறுகப் பிணித்த கால்களையுடையனவாய்,
கோட்டுமான் இனம் - கொம்புகளையுடையனவாகிய யானைக் கூட்டங்கள்,
வழங்கு ஆறும் - செல்லுகின்ற நெறிகளிலும், வண்டு சூழ்ந்து இறைகொள -
வண்டுகள் மொய்த்துத் தங்க, மால் மதம் நாறும் - மிகுந்த மதநீர்
மணக்கும்; குறுகுநுண் மருங்கு - மிக நுண்ணிய இடையானது. இறுத்து -
முறிய, எழு கோட்டு - பூரித் தெழுந்த தலைச்சிகரம்போன்ற
கொங்கைகளையுடைய, மான் இனம் - மான் போலும் மகயிர் கூட்டம்,
போம் மறுகும் - போகின்ற வீதிகளிலும், வண்டு சூழ்ந்து இறைகொள -
வண்டுகள் மொய்த்துத் தங்க, மான் மதம் நாறும் - கத்தூரி கமழும்
எ - று.

     கோட்டு மானினம் என்னுந் தொடர்கள் முன்னுள்ள அடைகளால்
யானைக் கூட்டத்தையும், மகளிரினத்தையும் குறிப்பன வாயின. மகளிரைக்
குறிக்குமிடத்துக் கோடு, மான் என்பன அவைபோலும் பொருளுக்காயின.
இறைகொள - தங்க : ஒரு சொல். மால் - பெரிய. மான்மத நாறும் என்பது
முன்னுங் கூட்டித் தனித்தனி முடிக்கப்பட்டது. கண்ணவாய் என்பது முதலிய
குறிப்புவினை யெச்சங்கள் கொம்புகளை யுடையனவாகிய என விரிக்கப்பட்ட
பெயரெச்சவினை கொண்டுமுடியும். இறுத்து : செயவெனெச்சத் திரிபு.மான்மத
நாறும்’ என்னும் வினை சிலேடையாய் ஆறு, மறுகு என்னும் இரண்டிற்கும்
பொருந்துதலின் பல வினைச்சிலேடையாகும். மேல் இங்ஙனம் வருவனவும்
இது. (34)