(இ - ள்.) கலைபயின்று - கற்றற்குரிய கலைகளைக் கற்று,
பரிநெடுந்தேர் கரிபயின்று - குதிரை நெடியதேர் யானை என்பவற்றைச்
செலுத்துந் திறமும் பயின்று, பலகை வாள் சிலை பயின்று - கேடகம் வாள்
வில் என்பவற்றின் வரிசையையும் கற்று, வருகுமரர் திறம் நோக்கி மகிழ்
வேந்தன் - வளர்கின்ற புதல்வர்களின் திறங்களைக் கண்டு மகிழும் அரசன்,
அலை பயின்ற கடல் ஆடை நிலமகளை - அலைகள் பொருந்திய கடலை
ஆடையாகவுடுத்த புவிமகளை, அடல் அணி தோள் மலை பயின்று குளிர்
தூங்க மகிழ்வித்து வாழும் நாள் - வெற்றியையே அணியாகப் பூண்ட
தோளாகிய மலையின்கண் தங்கி இன்புறுமாறு மகிழ்வித்து வாழுங்காலத்தில்.

     கலை கற்கும் நூல்கள். பரி முதலியன, அவற்றை ஊருந் தொழிற்கும்,
பலகை முதலியன அவற்றாற் பொருந்தொழிற்கும் ஆயின. திறம் - கூறுபாடு.
நிலமகளை மகிழ்வித்து எனக் கூட்டுக. மலையிலே தங்கிக் குளிர்ச்சியடைய
என்பதொரு நயமுங் காண்க. உயிர்களெல்லாம் இன்புற வருத்தமின்றாகப்
புரந்தான் என்பதனை இங்ஙனங் கூறினார். (5)

     (இ - ள்.) ஒரு செழு மறையோன் - ஓர் அழகிய வேதியன், செய்
ஏந்து திருப்புத்தூர் நின்றும் - வயல்கள் சூழ்ந்த திருப்புத்தூரினின்றும்,
அரவு எந்தும் பை அல்குல் மனைவியொடும் - பாம்பு ஏந்திய
படத்தினையொத்த அல்குலையுடைய மனைவியோடும், கை ஏந்து பால்
நல்வாய்க் குழவியொடும் - கடம் புகுந்து - காட்டின் வழியில் நுழைந்து, மாதுலன் பால் - மாமன் வீட்டிற்கு, மை ஏந்து பொழில் மதுரை நகர்
நோக்கி வருகின்றான் - முகிலைச் சுமந்திருக்கும் சோலை சூழ்ந்த மதுரைப்
பதியை நோக்கி வருகின்றான்.

     செய் ஏந்து - கழனிகளை மிகுதியாகவுடைய, செழுமை குணத்தின்
மேற்று. அரவு ஏந்தும் பை என மாறுக. மாதுலனிடத்தை யடைதற்கு நகர்
நோக்கி வருகின்றான் என்க. மை - மேகம். (6)