(இ - ள்.) அவ்வாறு அவ்வணங்கு அனையாள் உயிர் இழந்தாள் -
அவ்வண்ணமாக அத்தெய்வ மகளையொத்த பார்ப்பனி உயிர் துறந்தாள்;
அவ்வேலை - அப்பொழுது, வெம் ஆளி ஏறு அனையான் ஒரு வேடன் -
கொடிய சிங்க வேற்றினையொத்தவனாகிய ஒரு வேடன், செவ்வாளி ஏறிட்ட
சிலையுடையான் - தெரிந்தெடுத்த வாளியினை ஏறிட்ட வில்லையுடையவனாய்,
வெயிற்கு ஒதுங்கு நிழல் தேடி - வெயிலுக்கு ஒதுங்கி யிருக்கத்தக்க
நிழலினைத் தேடி, அவ்வால நிழல் எய்தி இளைப்பு ஆற அயல் நின்றான் -
அந்த ஆலமரத்தின் நீழலையடைந்து இளைப்பாறுதற்கு அம்மரத்தின்
பக்கலில் நின்றான்.

     செவ்வாளி - வடிவு செவ்விதாகிய அம்பு என்றும், குருதி தோய்ந்து
சிவந்த அம்பு என்றும் கூறலுமாகும்; பார்ப்பனியைக் கொன்ற
கொடுமையுடையதன்று என்னுங் குறிப்புத் தோன்றக் கூறிற்றுமாம். நிழல்தேடி
என்றமையால் அவ்வால் ஒன்றே அங்கே நிழல் மரமாயது என்பது
பெறப்படும். பார்ப்பனியைக் கண்டவனுமல்லனென்பார் 'அயல் நின்றான்'
என்றார். (9)

     (இ - ள்.) தண் நீர்க்குப் போய் ஆவி தலைப்பட்ட மறையவனும் -
தண்ணிய நீரினைக் கொணர்தற் பொருட்டுச் சென்று நீரோடையையடைந்த
அவ்வந்தணனும், உண் நீர் கைக்கொண்டு மீண்டு - உண்ணும் நீரினைக்
கைக் கொண்டு திரும்பி, ஒருங்கு இருந்த குழவியொடும் புண்ணீர்
வெள்ளத்துக் கால் தாழ்ந்து - உடன் சேரவிருந்த குழவியோடும் குருதி
வெள்ளத்தில் ஆழ்ந்து, உயிரைப் புறம் கொடுத்த - உயிரையிழந்த, பண்நீர
மழலை மொழிப் பார்ப்பனியை கண்ணுற்றான் - பண்போலும் இனிமைத்
தன்மையையுடைய மழலைச் சொல்லையுடைய தன் மனைவியைப் பார்த்தான்.

     ஆவி - பொய்கை. குழவியொடும் தாழ்ந்திருந்த பார்ப்பனியென்றும்
தன் உயிரைப் புறங்கொடுத்த பார்ப்பனியென்றும் கொள்க. வெள்ளத்துக்கால்
என்பதில், அத்து : சாரியை. கால் : ஏழனுருபு. புறங்கொடுத்தல் - புறம்பே
போகவிடுத்தல். நீர - நீர்மையுடைய; ஈர எனப் பிரித்து, குளிர்ந்த
என்றுரைத்தலுமாம். (10)

     (இ - ள்.) அயில் போலும் கணை ஏறுண்டு - வேல் போலுங் கூரிய
கணை தைத்து, அவ்வழி புண்நீர் சோர - அவ்வழியே குருதியொழுக, உயிர்
போகி மயில் போலக் கிடக்கின்றாள் மருங்கு அணைந்து - உயிர் நீங்கி
மயில் போன்று கிடக்கின்ற மனைவியின் அருகிற் சென்று, என் உயிர்