(இ - ள்.) விரை செய் தாரவன் - (அதனைக் கேட்டு) மணம் வீசும்
மாலையையணிந்த குரவன், யான் அங்கம் வெட்டினேன் அல்லேன் - யான்
சித்தனுடைய உடலை வெட்டினேனல்லேன்; நீங்கள் உரை செய்வது எவன்
- நீங்கள் இங்ஙனம் கூறுவது என்னை, என்போல் உடன்று சித்தனை மாய்த்து
- என் போல் வந்து போர் புரிந்து சித்தனைக் கொன்று, வரை செய்தோள்
விந்தைக்கு ஈந்தார் யார் - மலை போலும் தம் தோள்களைக் கொற்றவைக்கு
அளித்தார் யாவரோ, இது - இந்நிகழ்ச்சி, சுற்றும் திரை செய் நீர் வையை
கூடல் எந்தை திருவுளச் செயல் கொல் என்றான் - சூழ்ந்திரா நின்ற
அலைகளை வீசும் நீரினையுடைய வையை யாற்றினையுடைய நான்மாடக்
கூடலில் எழுந்தருளிய எம் தந்தையாகிய சோமசுந்தரக் கடவுளின் திருவுளச்
செயலோ என்று கூறினான்.

     வெட்டிலேன் என்பது வெட்டினேனல்லேன் என விரிந்து நின்றது :
வரை செய், செய் : உவமவுருபு. தோள்களை விந்தை குடியிருக்க அளித்தவர்.
அவன் தோளைத் தறித்துத் துர்க்கைக்குக் கொடுத்தவர் என்று பிறர் கூறுவர்;
அது சிறவாமை காண்க. சுற்றும் வையை - மதுரையைச் சூழ்ந்திருக்கும்
வையை. கொல் : ஐயப் பொருட்டு. (22)

     (இ - ள்.) கலவை மட்டித்த கொங்கை மனைவியும் - கலவை பூசிய
கொங்கையையுடைய குரவன் பன்னியும், சித்தன் தன்னைக் கிட்டி பல்காலும்
வந்து கேட்டதும் - சித்தனானவன் தன்னை நெருங்கி வந்து பல முறையும்
(இடனுண்டா என்று) கேட்டதும், நெருநல் வாய் ஒட்டி வந்து தன் கையைப்
பற்றி ஈர்த்ததும் - நேற்றைப் பொழுது நெருங்கி வந்து தனது கையைப்
பிடித்து இழுத்ததும், உள்ளம் வெந்து தட்டிப் போய்க் கதவம் தாழிட்டு
இருந்ததும் - மனம் நொந்து அவனை விலக்கிப் போய்க் கதவைத்
தாழிட்டுக் கொண்டு இருந்ததும், சாற்றினாள் - கூறினாள்.

     தட்டி - அகப்படாது தள்ளி. கதவம், அம் : பகுதிப் பொருள் விகுதி.
(23)