(இ - ள்.) எல் இடைப்படும் பொருள்களை இரா எழப் பார்த்தும் -
பகலிற்றோன்றும் பொருள்களை இரவிற் றோன்றுமாறு பார்த்தருளியும், அல்
இடைப்படும் பொருள்களைப் பகல்வர அமைத்தும் - இரவிற் றோன்றும்
பொருள்களைப் பகலில் வரச செய்தும், வல் அழல் புனல் உளர்வளி
வலிகெடப் பார்த்தும் - வலிய நெருப்பும் நீரும் அசைகின்ற காற்றுமாகிய
இவைகளின் வலிகெடப் பார்த்தருளியும், நல்ல போது காய் கனி இலா நாள்
படக் கண்டும் - நல்ல மலரும் காயும் கனியும் இல்லாத நாளில் உண்டாகச்
செய்தும்.      

     பகலிற் றோன்றுவன ஞாயிறு முதலியன. இரவிற்றோன்றுவன திங்கள்
முதலியன. வலிகெடப் பார்த்தல் - எரித்தல் நனைத்தல் அசைத்தல் முதலிய
இயல்பினை இழக்கச் செய்தல். இல்லா நாள் - உரியவல்லாத நாட்கள்,
பார்த்து, கண்டு என்பன செய்து என்னும் பொருளன. (15)

     (இ - ள்.) பீளை கால்விழிக் கிழவரைப் பிரம்பினால் வருடி - பீளை
ஒழுகும் விழியினை யுடைய விருத்தரைப் பிரம்பினால் நீவி, காளை ஆடவர்
ஆக்கி - காளைப்பருவத்தினையுடைய ஆடவராகச் செய்து, அக்கணவருக்கு
இசைய - அந்நாயகருக்குப் பொருந்த, ஈளைவாய் முது கற்பினார் - ஈளை
வாய்ந்த முதுமைப் பருவத்தினையுடைய கற்பிற் சிறந்த அவர் மனைவியர்,
கரு அடைந்து இளமை ஆள - கருவுற்று இளமைப் பருவத்தை அடையுமாறு,
வேத்திரம் வருடி நீறு அளித்து அருள் செய்தும் - பிரம்பினாலே தடவித்
திருநீறு அளித்துக் கருணை புரிந்தும்      

     கிழவர் என்னுஞ் சொல் உரியவர் என்னும் பொருளில் முன்பு வழங்கிப்
பின்பு முதியோரைக் குறிக்கும் பெயராயிற்று. ஈளை - கபத்தா லுண்டாகும்
இழைப்பு; பிறர் வீளையெனப் பிரித்தது பொருந்தாமை காண்க. இளமை
யெய்த வேத்திரம் வருடியும் கருவடைய நீறளித்தும் என்க. (16)

     (இ - ள்.) அகரம் ஆதி மூன்றாகி - அகரத்தை முதலாகவுடைய
மூன்றாகிய, ஆகருடணம் புகர் இலா அதிரிச்சியம் அஞ்சனம் -
ஆகருடணமும் குற்றமில்லாத அதிரிச்சயமும் அஞ்சனமும், பொருவுஇல்
வகரம் ஆதி மூன்றாகிய - ஒப்பில்லாத வகரத்தை முதலாகவுடைய
மூன்றாகிய, வசியம் வாதம் இகல் இலா வயத்தம்பம் - வசியமும் வாதமும்
மாறுபாடில்லாதவயத்தம்பமும், என்று இன்னவை செய்தும் - என்று
சொல்லப்டும் இவைகளைச் செய்தும்.