யுடைய கன்னி நாடனாகிய இராசேந்திர பாண்டியனது, கேண்மை பெற -
நட்பைப் பெறுதற்கு வரிசைக் கையுறை விடுத்தான் - வரிசையாகிய
கையுறையை அனுப்பினான் :

     இந்திரனுக்குப் புரந்தரன் என்பது ஒரு பெயராகலின் இராசேந்திரனை
அரசபுரந்தரன் என்றார். போவான் : வினையெச்சம். வரிசை, கையுறை
என்பன காணிக்கை என்னும் பொருளன. (2)

     (இ - ள்.) பொன்னி நாடன் வரவிடுத்த - காவிரி நாடனாகிய சோழ
மன்னன் வரவிடுத்த, பொலம் பூண் ஆடை முதல் பிறவும் - பொன்னாலாகிய
அணிகலன்களையும் பொன்னாடை முதலாக வுள்ள பிற பொருளையும்,
கன்னிநாடன் கைகவர்ந்து - கன்னிநாடனாகிய பாண்டியன் ஏற்றுக்கொண்டு,
தானும் கலக்கும் தொடர்பினால் கையுறை உய்த்து உறவுசெய்ய - வேறு
காணிக்கை விடுத்து நட்புச் செய்ய, சென்னி - சோழன், உவப்பு எய்தி,
மகிழ்ச்சியுற்று, அந்தச் செழியற்கு - அந்த இராசேந்திர பாண்டியனுக்கு, காதல்
மகள் கொடுப்பான் இசைந்தான் - தன் அன்புள்ள மகளைக் கொடுத்தற்கு
மனமிசைந்தான்.

     பொலம், பொன் என்பதன் றிரிபு. கலக்குந் தொடர்பு - ஒருவர்
ஒருவரோடு அளவளாவும் தொடர்பு. தானும் பேறு கையுறையுய்த்து என்க. (3)

     (இ - ள்.) செழியன் தனக்கு வரையறுத்த செய்தி கேட்டு - இராசேந்திர பாண்டியனுக்கு உறுதி செய்த செய்தியினைக் கேட்டு, செம்பியர்கோன் கழி
அன்பு உடைய குலமகளை - சோழ மன்னனது மிக்க அன்புடைய சிறந்த
புதல்வியை, தான் போய்க் கொள்வான் கருதி - தான் போய் மணந்து
கொள்ளக் கருதி, மதி வழிவந்த அவற்குத் தம்பி என வந்த - சந்திரன்
மரபில் வந்தவனாகிய அவனுக்குத் தம்பி என்று சொல்லத் தோன்றிய,
அரசசிங்கம் எனும் பழி அஞ்சாதான் - அரச சிங்கனென்னும்
பெயரினையுடைய பழியினை அஞ்சாத ஒருவன், வஞ்சித்துப் பழனக்
காஞ்சிப்பதி புகுவான் - (முன்னவனை) வஞ்சித்து வயல்சூழ்ந்த காஞ்சிநகரிற்
செல்வானாயினன்.

     கொள்பான் : வினையெச்சம். வந்த அவற்கு என்பது வந்தவற்கு எனத்
தொகுத்தலாயிற்று. தம்பி யெனற்குத் தகாதவன் என்பார் ‘தம்பி யென வந்த’