மடங்கி, அவ்விருவகை இந்திரியங்களும் தொழிற்பாடின்றி ஆண்டு
நின்றொழியும் அவத்தையின், ஏனை அந்தக்கரண முதலியன தொழிற்படினும்
புறப்பொருள் விடயமாகாமையின் அகத்தே சூக்கும தேகத்தோடு நின்று
ஆண்டைக் குரிய இருவினைப் பயன்களை நுகர்ந்து நிற்கும் அவத்தை
சொப்பனம்" என்னும் சிவஞான போதமா பாடியத்தாலுணர்க. (11)

     (இ - ள்.) புலர்ந்தபின் - விடிந்த பின்னர், தாயத்தோரை -
பங்காளிகளை, புரவலன் ஆணை ஆற்றால் - அரசன் ஆணை வழியால்,
மறித்தனை - மறித்து, வலம்தரு மன்றத்து ஏற்றி இருத்தி - வெற்றியைத்
தரும் அவையின்கண் ஏற்றி இருப்பாயாக; யாம் போந்து - யாம் வந்து,
அலம் தரும் அறிவால் மூத்தோர் அனைவரும் இசைய - அமைந்த
உணர்வினால் முதியோரனைவரும் உடன்பட, அந்தச் சலம் தரு வழக்குத்
தீர்த்துத் தருகுவம் - அந்தப் பொய்ய வழக்கினை ஒழித்து உன் பொருளைக்
கொடுப்போம்; போதி என்றார் - நீ போகக் கடவை என்றருளிச் செய்தார்.

     அரசன் ஆணை கூறியழைப்பின் மீறிச் செல்லாராகையால் 'புரவலன்
ஆணையாற்றால் மறித்தனை மன்றத் தேற்றி' என்றார். வலந்தரு மன்றம் -
உண்மையுணர்த்தி வெற்றியைத் தரும் மன்றம்; அறங்கூறவையம். மறித்தனை :
முற்றெச்சம். அலம் - அமைவு. அனைவருக்கும் பொருந்த என்றுமாம். சலம்
- பொய். இருத்தி, போதி என்பவற்றில் த் : எழுத்துப் பேறு. (12)

     (இ - ள்.) வேரி அம் குவளை உண்கண் விழித்தனள் - தேனையுடைய
அழகிய குவளை மலரை வென்ற கண்கள் விழித்து, வியந்து - அதிசயித்து,
கெட்டேன் - ஆ கெட்டேன்!, ஆரும் இல்லார்க்குத் தெய்வம் துணை என்பது
அறிந்தேன் என்னா - அகதிக்குத் தெய்வந்துணை என்னும் பழமொழியை
அறிந்தேனென்று கூறி, கார் இருங்கயல் உண்கண்ணாள் கணவனை - கரிய
பெரிய மையுண்ட கயல்போலுங் கண்களையுடைய அம்மையின் நாயகனாகிய
சோமசுந்தரக் கடவுளை, தொழுது வாழ்த்தி - வணங்கித் துதித்து, சீர் இளங்
குமரனோடும் - சீரிய இளமை பொருந்திய புதல்வனோடும், தெரிவை தன்
மனையில் சென்றாள் - அம்மாது தனது இல்லின்கட் சென்றனள்.   

     (பா - ம்.) * அனைவரு மறிய.