(இ - ள்.) வரம்பு இல் மாதரார் - அளவிறந்த மாதர்கள், மதுரவாய் திறந்து - இனிய வாயினைத் திறந்து, தேன் வாக்கும் ஏழ் இசை - தேனைச்
சொரிவது போற் பாடும் ஏழிசைகளும், நரம்பின் யாழ் இசை -
நரம்புகளையுடைய யாழின் இசைகளும், நகை மலர்த் தருவின் -
விளங்குகின்றமலர்களையுடைய மரங்களில் உள்ள, சுரும்பின் ஏர் இசை -
வண்டுகளின் அழகிய இசையும், நாரதர் தும்புரு இசைக்கும் - நாரதரும்
தும்புருவும் பாடுகின்ற, இரும்பு நீர் மெழுகு ஆக்கிய இன் இசை -
இரும்பினை மெழுகு போல இளகுந் தன்மையாக்கிய இனிய இசையுமுள்ள,
எங்கும் - எல்லா விடங்களும்.

     தேன் வாக்கும் என்பதற்கேற்ப வாயை மலராக்குக. வாக்கும் ஏழிசையும்
நரம்பின் யாழிசையும் எனக் கூட்டுக; யாழுடன் கூடிய வாக்கும் இசை
என்றியைத்துரைத்தலுமாம். ஏழிசை முற்கூறப்பட்டமை காண்க. மெழுகு நீர்
என மாறுக. எங்கும் என்பதனை எல்லா இடங்களும் எனக் கொண்டு யாறு
முதலியவற்றோடு எண்ணுக. (34)

     (இ - ள்.) அமுத வாவியும் - அமிழ்த மயமான நீரினையுடைய
நடைக்கிணறும், பொன் அம்புய மலர்த்தடமும் - பொன் போன்ற தாமரை
மலர்கள் நிறைந்த தடாகங்களும், குமுதவாய் அரமாதர் ஆம் குயில் இனம்
பயிலும் - செவ்வல்லி மலர் போலும் வாயினையுடைய தேவ மகளிராகிய
குயிற் கூட்டங்கள் விளையாடும், நிமிரவாள் விடும் மரகதம் - நிரம்ப
ஒளிவிடும் மரகதம் போன்ற, நெடிய பைங்காவும் - நீண்ட பசிய
சோலைகளும், திமிரம் மாசு அறக் கழுவிய - இருளாகிய களங்கம் ஒழியுமாறு
கழுவிய, தேவர் வாழ் பதமும் - தேவர்கள் வாழ்கின்ற பதங்களும்.

     வாவி - நடைக் கிணறு, நிமிர - மிக. தேவர் ஒளி வடிவினராகலின்
'திமிர மாசறக் கழுவிய தேவர்' என்றார்; ஆணவ இருளுமாம். (35)

     (ப - ம்.) * வார்க்கும், +நாரத தும்புரு. +அலங்கு பாற்கடல்.