(இ - ள்.) என்ன இருந்து அலமருவாள் - என்று கருதியிருந்து
மனஞ் சுழலுவாள்; இருக்குமிடத்து - (இங்ஙனமாகக் கௌரி வருந்தி)
இருக்கு மிடத்தில், அவள் உள்ளத்து எண்ணியாங்கே - அவள் மனத்திற்
கருதியவாறே, தென்னவனாய் இருந்து அரசு செய்த பிரான் - சுந்தர
பாண்டியனாய் வீற்றிருந்து ஆட்சி புந்த சோமசுந்தரக்கடவுள், அவட்கு
அருளும் செவ்வி நோக்கி - அவளுக்கு அருள் புரியும் பருவத்தை
நோக்கி, கன்னம் உரம் கரம் சிரம் தோள் கண்டமும் கண்டிகை பூண்டு -
காதுகளிலும் மார்பிலும் கைகளிலும் சென்னியிலும் தோள்களிலும்
கழுத்திலும் உருத்திராக்கம் அணிந்து, தம்போல் பல் நெடுநாள் பழகியது
ஓர் தனிப்பெரிய புத்தகமும் - தம்மைப்போலப் பன்னெடுங்காலம்
பழகியதாகிய ஓர் ஒப்பற்ற பெரிய புத்தகத்தையும், பக்கம் கையில் சேர்த்தி
- பக்கத்தே கையில் வைத்துக்கொண்டு.

     மேற்செய்யுளிற் கூறியதைச் சுட்டி ‘என்ன’ என்றார். ‘உண்மாசு
கழுவுவது’ ‘சிவனடியார்க்கு’ என்னுஞ் செய்யுட்களிலுள்ள ‘கவலை
கூர்வாள்’, ‘தளர்வாள்’ என்பவற்றை எச்சமாக்கி, இச்செய்யுளில்
‘அலமருவாள்’ என்பததைப் பெயராக்கலுமாம். எண்ணியாங்கே அருளுஞ்
செவ்வி நோக்கி யென்க; கன்னம் முதலியவற்றில் எண்ணும்மை விரித்துக்
கொள்க. தம்மைப்போல அனாதியாக விருந்து தம்முடன் பயின்றதாகிய
புத்தகம் என்க; இப்பொழுது கொண்ட முதுமைக் கோலத்தைக் கருதி,
தம்மைப்போல் நெடுநாட் பழகியதாகத் தோற்றும் புத்தகம் எனக் கூறினார்
எனலுமாம். பக்கத்திலே கையில் வைத்துக் கொண்டு என்க. (19)

     (இ - ள்.) கரிந்த நீள்கயல் முள்ளின் நரையும் - கரிய நீண்ட கயல்
மீனின் முள்ளைப் போன்ற நரையும், முதுதிரைகவுளும் - மிகவுந் திரைந்த
கபோலமும், கனைக்கும் நெஞ்சும் - அடிக்கடி கனைக்கின்ற மார்பும்,
சரிந்த கோவண உடையும் - ஒரு புறம் சரிந்துள்ள கோவணம் போக்கிய
ஆடையும், தலைப்பனிப்பும் - தலை நடுக்கமும், உத்தரியம் தாங்கு தோளும்
- மேலாடை தாங்கிய தோளும், புரிந்த நூல் கிடந்து அலையும் புண்ணிய