(இ - ள்.) வெள்ளை மாமதிப் பிளவு அணி - வெண்மையாகிய
பெருமை பொருந்திய பிறைமதியை அணிந்த, வேணி அம்கருணை
வள்ளலார் பணி - சடையையுடைய அழகிய அருள்வள்ளலாகிய
சோமசுந்தரக்கடவுள் கட்டளையை, சிரத்தினும் மனத்தினும் தாங்கி -
முடிவிலும் மனத்திலும் தாங்கி, பள்ளம் ஏழையும் பருகினோன் - கடல்
ஏழையுங்குடித்த குறுமுனிவன், பணியும் நக்கீரன் உள்ளம் மாசு அற -
தன்னை வணங்கிய நக்கீரனது உள்ளத்திலுள்ள அறியாமை நீங்க,
வியாகரணத்தினை உணர்த்தும் - இலக்கணத்தை அறிவுறுத்தும்.

     வியாகரணம் - இலக்கணம். (19)

     (இ - ள்.) இருவகைப்புறவுரை தழீஇ - பொதுவுஞ் சிறப்புமாகிய
இருவகைப் புறவுரைகளையும் முன்னர்ப்பொருந்தி, எழுவகை மதமொடு -
உடன்படல் முதலிய எழுவகை மதங்களோடும், நாற்பொருளொடும் புணர்ந்து
- அறமுதலிய நான்கு பொருளோடும்கூடி, ஐஇரு குற்றமும் போக்கி -
குன்றக்கூறல் முதலிய பத்துக் குற்றங்களையும் அகற்றி, ஒரு இல் ஐ இரண்டு
அழகொடும் - நீங்குதல் இல்லாத சுருங்கச் சொல்லல் முதலிய பத்து
அழகோடும், உத்தி எண்ணான்கும் மருவும் - முப்பத் திரண்டு உத்தியும்
பொருந்தும், ஆதிநூலினைத் தொகைவகை விரிமுறையால் - முதனூலினைத்
தொகையும் வகையும் விரியுமாகிய முறையினால்.

     புறவுரை - பாயிரம். நாற்பொருள் - அறம் பொருள் இன்பம் வீடு,
எழுவகை மதம், பத்துக் குற்றம், பத்தழகு, முப்பத்திரண்டு தந்திரவுத்தி
(நூற்புணர்ப்பு) என்பவற்றைப் பின்வருஞ் சூத்திரங்களால் முறையே அறிக.