(இ - ள்.) வான்தமிழ்ச் சங்கத் தெய்வப் புலவோரும் - சிறந்த தமிழ்ச்
சங்கத்துத் தெய்வத்தன்மை பொருந்திய புலவர்களும், உடன் எழுந்து - ஒரு
சேர எழுந்து, சைலவேந்தன் மங்கைநாயகன்போன வழிபோய் -
மலைமன்னன் புதல்வியாராகிய உமையின் கேள்வன் சென்றவழியே சென்று,
அங்கு இருந்தார் - அங்குத் தங்கினர்; அவ்வழி நாள் வைகல் கங்குல்வாய்
புலரவரும் வைகறையில் - அந்நாளின் பின்னாள் இராப்பொழுது கழியவரும்
காலைப்போதில், பள்ளி உணர்காலத்து எய்தி - இறைவனது திருப்பள்ளி
எழுச்சிக்காலத்திற் சென்று, அங்கண் நாயகன் அடியார் சேவிப்பார் -
அச்சிவபெருமான் அடியார்கள் வணங்கலுற்றவர்கள், அங்கு இலிங்க
உருக்காணார் - அத் திருக்கோயிலின்கண் இலிங்கத் திருவுருவத்தைக்
காணாதவராய்,

     சேவிப்பாராகிய அடியார் என்றுமாம். (12)

     (இ - ள்.) ஈது என்ன அதிசயம் என்று அயிர்த்தார் - இஃது என்ன
அதிசயம் என்று ஐயுற்று, இரங்கினார் - வருந்தி, ஓடி இதனை மன்னவனுக்கு
அறிவிப்பான் வேண்டும் என - விரைந்து சென்று இச்செய்தியை அரசனுக்கு
அறிவிக்க வேண்டுமென்று கருதி, புறப்பட்டு வருவார் - புறப்பட்டுவரும்
அடியார்கள், ஆவி அன்னவரைப் பிரிந்து உறையும் அணங்கு அனையார்
எனவும் - உயிர்போன்ற கேள்வரைப் பிரிந்து வசிக்கும் தெய்வமகளிர்
போன்ற பெண்கள்போலவும், அலர் அணங்குநீத்த பொன் அவிர்தாமரை
எனவும் - திருமகள் கைவிட்ட பொன்போல விளங்குந் தாமரை போலவும்,
புலம்பு அடைந்து - தனிமை அடைந்து, பொலிவு அழிந்தபுறமும் கண்டார் -
பொலிவழிந்து நிற்கும் நகரத்தினையுங் கண்டனர்.

     அயிர்த்தார் இரங்கினார் என்பவற்றை முற்றாகவே யுரைத்தலுமாம்.
அறிவிப்பான். வினையெச்சம். பொன்னவிர் என்பது தாமரைக்கு
இயற்கையடை. (13)