அனந்தம் உள்ள - இங்குத் தாமே தோன்றியனவாய் அளவிறந்த
அருட்குறிகள் உள்ளன; தானவர் இயக்கர் சித்தர் - அசுரர்களும்
இயக்கர்களும் சித்தர்களும், வயம் புரி அரக்கர் வானோர் முனிவரர் மனிதர்
உள்ளார் - வெற்றியை விரும்பிய அரக்கர்களும் தேவர்களும் முனிவர்களும்
மனிதர்களும், நயம் பெற விதியால் கண்ட - தாங்கள் விரும்பிய
நலன்களைப் பெறுதற் பொருட்டு ஆகமவிதிப்படி நிலைபெறுத்திய, நம் குறி
அனந்தம் உண்டு - நமது அருட்குறிகளும் பல உள்ளன.

     சயம்பு - சுயம்பு; தானே தோன்றியது. உள்ள, அன்பெறாத பலவறிச்
சொல். குறி - இலிங்கம். ஆல், அசை. (25)

     (இ - ள்.) அக்குறிகளில் மேம்பட்டகுறி அறுபத்து நான்காம் -
அவ்வருட் குறிகளிற் சிறந்த குறிகள் அறுபத்து நான்காகும்; இக்குறிகளில்
மேம்பட்ட குறிகள் எட்டு - இவ்வறுபத்து நான்கு குறிகளிற் சிறந்த குறிகள்
எட்டாகும்; இனைய - இவ்வெட்டுக்குறிகளும், எட்டுத்திக்கு உறை வானோர்
பூசை செய்தன - எட்டுத் திசைகளிலும் இருக்கும் தேவர்களாற்
பூசிக்கப்பட்டன; இவற்று யாம் வந்து புக்கு உறைகுறி - இவ்வெட்டனுள்
யாம் வந்து புகுந்து உறையுங் குறியானது, நம் தோழன் பூசித்த குறியது
ஆகும் - நமது நண்பனாகிய குபேரன் வழிபட்ட குறியாகும்.

     குறியது, அது பகுதிப்பொருள் விகுதி. (26)

     (இ - ள்.) அறைந்த இத் தெய்வத்தானம் அனைத்தும் - மேற்கூறிய
இந்த அருட்குறிகள் உள்ள இடம் அனைத்தும், ஓர் ஊழிக்காலத்து இறந்த -
ஒரு ஊழிக் காலத்தில் மறைந்தன; நம் தோழன் கண்ட இலிங்கமாம்
அதனால் - இது நமது நண்பன் கண்டு வழிபட்ட இலிங்கமாகுமாதலால்,
இங்கே உறைந்தனம் - இக்குறியின்கண் உறைந்தருளினோம்; உறைதலாலே
- இங்ஙனம் உறைதலால், இந்தத் தெய்வத்தானம் - இத் தெய்வத்தானமானது,
இன்று முதல் - இன்று முதலாக, உத்தர ஆலவாயாய்ச் சிறந்திடத் தகுவது -
வடதிருவால வாயாகிச் சிறக்கத்தக்கது.

     இறந்த, அன்பெறாத பலவின்பால் முற்று. உத்தர ஆலவாயாய்ச்
சிறந்திடத் தகுவது - வடமதுரை யென்னும் பெயருடன் விளங்கத்தகுவது. (27)