(இ - ள்.) அளந்து சூழ் - வரையறுக்கப்பட்டுச் சூழ்ந்த,
திருவாலவாய் மதிலின் புறத்து - திருவாலவாயின் மதிற்புறத்திலே, அகழ்
ஆழிபோல் - தோண்டிய கடல்போல், வளைந்த சோழன் நெடும்படைக்கு
எதிர் - முற்றிய சோழனது பெரிய படைக்கு எதிரே, வஞ்சி வேய்ந்து எழு
பஞ்சவன் - வஞ்சிமாலை யணிந்து போருக் கெழுந்த பாண்டியனது, கிளர்ந்த
சேனை அதிர்ந்து கிட்டின - ஊக்கத்துடன் எழுந்த படைகள் ஆரவாரித்து
நெருங்கின; கிட்டி அவ்விருபடைஞரும் - அங்ஙனம் நெருங்கி
அவ்விருதிறத்துப் படைவீரரும், களம் சிறந்திட வஞ்சினம்கொடு கை வகுத்து
அமர் செய்வர் - போர்க் களஞ் சிறக்க வஞ்சினங் கூறிப் படை வகுத்துப்
போர்புரிவா ராயினர்.

     அகழ் ஆழிபோல் என்பதற்கு அகழியாகிய ஆழிபோல்
என்றுரைத்தலுமாம். அகழ் - அகழியாதலை ‘வையையும் ஒருபுறத் தகழாம்’
என நகரப் படலத்துட் போந்தமையா லறிக. வஞ்சி - மண்ணசையால்
மேற்சேறல். (11)

     (இ - ள்.) சையம் ஒத்து எழு தேரினாரோடு சையம் ஒத்து எழு
தேரரும் - மலையை யொத்தெழுந்த தேரினையுடைய வீரருடன் தேர்வீரரும்,
மையல் மைக்கரி வீரரோடு எதிர் மையல் மைக்கரி வீரரும் -
மதமயக்கத்தையுடைய கரிய யானை வீரருடன் யானைவீரரும், கொய்
உளைப்பரி வயவரோடு இகல் கொய்உளைப் பரி வயவரும் - கொய்யப்பட்ட
பிடரி மயிரையுடைய குதிரை வீரருடன் மாறுபட்டெழுந்த குதிரை வீரரும்,
கை அழல் படை வீசி - கைகளால் நெருப்புச் சிந்தும் படைக் கலங்களை
வீசி, மின் விடு கார் எனப் பொருவார் - மின்னலை வீசும் மேகம்போல
நின்று போர் புரிவாராயினர்.

     சையம் - மேற்கிலுள்ள ஒரு மலை. அடைகள் தேர் முதலியவற்றிற்
குரியன. அரோ : அசை. (12)