(இ - ள்.) தக்கமேருமா மலைமகன் - தகுதி வாய்ந்த பெரிய
மலையரையன் செய்த, மிக்கதவத்தால் ஓடையில் - சிறந்த தவத்தினால்
மலரோடையிலும், மீனவன் வேள்வியில் - பாண்டியன் செய்த
சிறந்ததவத்தினால் வேள்வியிலும், விரும்பிய மகவாய் - அவர்கள் வேண்டிய
குழந்தை வடிவமாய், புக்கநாயகி - சென்று வெளிப்பட்ட இறைவி, தன்பதி
ஆணையால் - தனது பதியாகிய இறைவன் ஆணையினால், புலவுதொக்க
மீன்விலை வலைஞன் - புலால்நாற்ற மிக்க மீன்விற்கும் பரதவ மன்னன்,
மேல் தவப்பயன் துரப்ப - முற்பிறப்பிற் செய்த தவப்பயன் செலுத்த.

     பொன்னென்னும் ஒற்றுமைபற்றி இமயத்தை மேருவென்றும், மேருவை
இமயமென்றும் ஒரோவழிக் கூறுவர்; "இமயவில் வாங்கிய" என
எட்டுத்தொகையுள் வருதலுங் காண்க. மிக்க தவத்தால் என மாறி
மலைமகனுக்கும் மீனவனுக்கும் கூட்டுக. மலையரையனுக்கு மகளானமையைக்
கந்தபுராணம் பார்ப்பதிப்படலத்திலும், மலயத்துவச பாண்டியனுக்கு
மகளானமையை இப்புராணத்துத் தடாதகைப் பிராட்டியார் திருவவதாரப்
படலத்திலும் காண்க. (23)

     (இ - ள்.) இச்சையால் ஒரு திருமகவு ஆகி - தமது இச்சையின்
வழியே ஒரு திருமகளாகி, அவன் அன்பினுக்கு இரங்குவாள் போல் -
அப்பரதவ மன்னன் அன்பினுக்குத் திருவுள்ள மிரங்குவாள் போல,
செச்சைவாய் திறந்து அழுது - தமது செந்நிறமுள்ள திருவாயினைத்திறந்து
அழுது, நெய்ச்ச பாசிலைப்புன்னை நல் நீழலில் கிடந்தாள் -
நெய்ப்பினையுடைய பசிய இலைகளடர்ந்த புன்னை மரத்தின் குளிர்ந்த
நிழலின்கண் கிடந்தனள்; மைச்சகார் உடல் கொடுங்தொழில் வலைஞர்
கண்டான் - கரிய பெரிய உடலையும் கொடிய தொழிலையு முடைய பரதவர்
மன்னன் கண்டனன்.

     செச்சை - செந்நிறம். நெய்த்த, மைத்த என்னும் குறிப்புப்
பெயரெச்சங்கள் எதுகை நோக்கிப் போலியாயின. கருமை பெருமையு
மாகலின் காருடல் என்பதற்குப் பெரிய உடல் என உரைக்கப்பட்டது. (24)