(இ - ள்.) கார்கொள் நீர்த் திருமாதுகொல் - கரிய கடலின்கண்
தோன்றிய திருமகளோ, கரந்துநீர் உறையும் - நீரின்கண் மறைந்து வசிக்கும்,
வார் கொள் பூண்முலை மடந்தைகொல் - கச்சினை அணிந்த அணிகலன்
தங்கிய கொங்கையையுடைய நீரரமகளோ, வனத்துஉறை வாழ்க்கை -
கானின்கண் உறையும் வாழ்க்கையினையுடைய, தார்கொள் பூங்குழல்
அணங்குகொல் - மாலையை யணிந்த பொலிவான கூந்தலையுடைய
கானரமகளோ, ஆர்கொலோ மகவுஆகி - இவருள் யாரோ ஒரு பெண்
மகவாகி, தடங்கணும் இமைப்ப - பெரிய கண்களும் இமைக்க, ஈண்டு
இருந்தனள் - இங்கு இருந்தனள்; என்னா - என்று கூறி.

     வனத்துறை வாழ்க்கை அணங்கு - வனதேவதை. குழவியின்
பேரழகால் இங்ஙனம் ஐயுற்றானென்க. தடங்கணும் இமைப்ப என்றது
மானுடவுருக் கொண்டிருத்தல் குறிப்பித்தவாறு. கொல், ஐயப்பொருட்டாய
இடைச்சொல். (25)

     (இ - ள்.) பிள்ளை இன்மையேற்கு - பிள்ளையில்லாத எனக்கு,
எம்பிரான் தமிழ்க்கூடல் வள்ளல் - எமது பெருமானாகிய தமிழையுடைய
நான்மாடக் கூடலிலுறையும் சோமசுந்தரக் கடவுள், இரங்கி நல்கிய மகவு
இதுவே என - அருள்சுரந்து ஈந்தருளியமகவே இது என்று கருதி,
வலத்தோள் துள்ள - வலது தோள் துடிக்க, அன்பு கூர்ந்து எடுத்து
இருதோள் உறப் புல்லி - அன்பு மிகுந்து எடுத்து இரண்டு தோள்களும்
பொருந்தத் தழுவி, தன்அருந்தகைக் கற்பினாள் தனது கைக்கொடுத்தான் -
நீங்குதலில்லாத தகுதியையுடைய கற்பினையுடைய மனைவியின் கையிற்
கொடுத்தான்.

     இன்மையேன் - இன்மையை உடையேன்; இல்லேன். வேண்டுவார்
வேண்டுவதை யீதல் பற்றி 'வள்ளல்' என்றான். மகவே என ஏகாரம்
பிரித்துக் கூட்டுக. ஆடவர்க்கு வலத்தோள் துடித்தல் நன்னிமித்தமாகும். (26)