(இ - ள்.) ஆலவாய் உடை நாயகன் - திருவாலவாயுடைய இறைவன்,
ஏவியவாறே - பணித்தவண்ணமே, மாலை தாழ் இளமதிச்சடை மகுடமும் -
மாலை தாழ்ந்த இளம்பிறையணிந்த சடைமுடியும், கரங்கள் நாலுமாகிய வடிவு
உடை நந்தியும் - நான்கு திருக்கரங்களும் பொருந்திய வடிவினையுடைய
திருநந்திதேவும், சுறவக்கோலமாகி - சுறாமீன் வடிவமாகி, வெண்திரைக்கடல்
குளித்து இனிது இருந்தான் - வெள்ளிய அலைகளையுடைய கடலில் மூழ்கி
இனிதாக இருந்தனன்.

     நந்தியும், உம்மை எச்சப்பொருட்டு. (32)

     (இ - ள்.) குன்று எறிந்தவேல் குழகனும் - கிரவுஞ்சமலையைப்
பிளந்த வேற்படையை யுடைய முருகக்கடவுளும், கரிமுகக் கோவும் -
யானை முகத்தை யுடைய மூத்தபிள்ளையாரும், அன்று எறிந்த தந்திரம்
எலாம் - அன்று கடலின்கண் வீசிய நூல்களனைத்தையும், சிரமிசை அடக்கா
- முடியின்கண் அடக்கியும், கன்று எறிந்தவன் அறிவரும் கழல் - விளங்கனி
உதிரக் கன்றினை வீசிய திருமாலும் அறிதற்கரிய திருவடியை, மனத்து
அடக்கா நின்று - மனத்தின்கண் அடக்கியும் நின்று, எறிந்த நல் மத்து என
உழக்கிடாநிற்கும் - கடலைக்கலக்கிய மந்தரமலையாகிய மத்தைப்போல
அதனைக் கலக்கா நின்றது அச் சுறா மீன்.

     தந்திரம் - நூல்; ஆகமம் ஓரசுரன் ஆன்கன்றின் வடிவு கொண்டு
தீங்கு புரியவருதலையறிந்த கண்ணன் அக்கன்றினைக் குணிலாகக்கொண்டு
விளவின்கனி யெறிந்து அவனுயிர் செகுத்தனன் என்பது வரலாறு;

     "கன்றுகுணிலாக் கனியுகுத்த மாயவன்"

என்றார் இளங்கோவடிகளும். (33)