(இ - ள்.) முடங்கு வெஞ்சிலை வில்லரோடு முடங்கு வெஞ்சிலை
வில்லரும் - வளைந்த கொடிய வில்லையுடைய வீரருடன் வில் வீரரும்,
விடம் கலுழ்ந்திடு வேலரோடு விடம் கலுழ்ந்திடு வேலரும் - நஞ்சினை
யுமிழும் வேலினையுடைய வீரருடன் வேல்வீரரும், இடம் கை தோல் வலம்
வாளரோடும் - இடக்கையிற் கேடகமும் வலக்கையில் வாட்படையு முடைய
வாள் வீரருடன், இடம் கை தோல் வலம் வாளரும் - அவற்றையுடைய
வாள் வீரரும், மடங்கல் ஏறும் மடங்கல் ஏறும் மலைப்பது என்ன - சிங்க
வேறும் சிங்க வேறும் போர்புரிவது போல, மலைப்பர் - போர் புரிவர்.

     சிலை என முன் வந்தமையின் வில்லர் என்பது வீரர் என்னும் பெயர்
மாத்திரையாய் நின்றது. (13)

     (இ - ள்.) அரவின் - அனந்தன் என்னும் பாம்பினைப்போல,
நல்நிலம் அம்புயம் பொறை ஆற்றும் மீனவன் - நல்ல நிலவுலகத்தை
அழகிய தோளினாற் றாங்கும் பாண்டியன், ஆற்றல் கூர் புரவியின் நிரை
வையம் மேல் கொடு - வலி மிக்க குதிரைகள் வரிசையாகப் பூட்டப்பட்ட
தேரில் ஏறி, போந்த நேரியர் வேந்தன் நேர் விரவி - போருக்கு வந்த
சோழமன்னன் எதிர் சென்று கலந்து, மின்னிய முரசு இயம்ப - விளங்கிய
போர் முரசு ஒலிக்க, மிடைந்து வெஞ்சமர் ஆடும் ஆறு - நெருங்கி
வெவ்விய போர் புரியுந் தன்மை, இரவி தன்னொடு மதியவன் பொர
ஏகினால் நிகர் ஆகும் - சூரியனோடு சந்திரன் போர்புரியச் சென்று
புரிந்ததை ஒக்கும்.

     அரவின், இன் : ஒப்புப் பொருட்டு; அரவினாற் சுமக்கப்பட்ட
நிலத்தை என விரித்துரைத்தலுமாம். நேரியர் - நேரி வெற்பினை யுடையவர்;
சோழர். பரிதி மரபினனாகிய சோழனொடு திங்கள் மரபினனாகிய
பாண்டியன் பொரச் சென்றது பரிதியொடு திங்கள் பொரச் சென்றது போலும்
என்றார்; இதனாற் சோழன் முன் பாண்டியன் ஆற்றல் குன்று மென்பதும்
குறிப்பித்தவாறாயிற்று. (14)

     (இ - ள்.) துள்ளும் மா ஒலி - தாவிச் செல்லுங் குதிரைகளின்
கனைப்பொலியும், தான யாறு துளும்பும் மா ஒலி - மத நீரை ஆறுபோலப்
பெருக்கும் யானைகளின் பிளிறொலியும், தூண்டு மா தள்ளும் தேர் ஒலி -
தூண்டப்படுங் குதிரைகளால் இழுக்கப்படுந் தேர்களின் ஒலியும், படையொடு
படைதாக்கும் மா ஒலி - படைகளொடு படை தாக்கும் பேரொலியும்,