(இ - ள்.) இனிப் பிறப்பில் அழுந்தார் - இனிப் பிறப்பினுள்
அழுந்தாதவராகிய வாதவூரடிகள் அப்பொழுது எழுந்து, உடைய பெருந்துறை
இருதாள் பணிந்தார் - தம்மை ஆளாகவுடைய பெருந்துறை நாதரின் இரண்டு
திருவடிகளையும் பணிந்து, வழிக்கொண்டார் அடைந்தார் நெறிகள் அகன்றார்
- வழிக்கொண்டு சென்று சேய நெறிகளைக் கடந்து, அவிர்திங்கள் கொழுந்து
ஆர் சடையார் விடையார் - விளங்காநின்ற இளஞ்சந்திரனை அணிந்த
சடையினை யுடையாரும் இடப வூர்தியை யுடையாருமாகிய சோமசுந்தரக்
கடவுளின், தென்கூடல் அணைந்தார் - மதுரையைச் சார்ந்து, பாடுஅளி
வண்டு உழும்தார் வேந்தன் பொற் கோயில் உற்றார் - இசைபாடும்
வண்டுகள் கிண்டா நின்ற வேப்பமலர் மாலையை யணிந்த பாண்டியனது
பொன்மயமான அரண்மனையை அடைந்து, காணப் பெற்றார் - அரசனைக்
காணப் பெற்றனர்.

     அழுந்தார், வினையாலணையும் பெயர். எழுந்தார், பணிந்தார், வழிக்
கொண்டார், அடைந்தார், அகன்றார், அணைந்தார், உற்றார் என்பன
முற்றெச்சங்கள். அளி வண்டு - அளியாகிய வண்டு. ஆல், அசை. (73)

     (இ - ள்.) மன்னர் பெருமான் எதிர்வந்த மறையோர் பெருமான் -
மன்னர் மன்னனாகிய பாண்டியனுக்கு முன்னேவந்த வேதியர் பெருமானாகிய
அடிகள், முன்னர் முறையால் வழிபாடு செய்தொழுகி - முன் செய்யும்
முறைப்படியே வழிபாடு செய்தொழுகி, முன்னே நிற்ப - எதிரில் நிற்க,
தென்னர் பெருமான் முகம் நோக்கி - அப்பாண்டியர் தலைவன் அவர்
முகத்தைப் பார்த்து, எவ்வளவு செம்பொன் கொடு போய் - எவ்வளவு
செம்பொன்னை எடுத்துச் சென்று, எவ்வளவு நன்னர் இவுளி கொண்டது
எனக் கேட்டான் - எவ்வளவு நல்ல குதிரைகள் வாங்கிய தென்று
வினவினன்; கேட்ட நான் மறையோர் - அதனைக்கேட்ட அடிகள்.

     முன்னர் முறை - புரவி வாங்கப் புறப்படுமுன் அமைச்சராகிய தாம்
அரசர்க்குச் செய்து போந்த முறை. தென்னர் பெருமான், நான் மறையோர்
என்பவற்றைச் சுட்டாகக் கொள்க. நன்னர், பண்புப் பெயர். கொண்டது,
தொழிற்பெயர். கேட்டல் இரண்டனுள் முன்னது வினாவுதல், பின்னது
செவியுறல். (74)