விலங்கு பூட்டிச் சிறைப்படுத்தினாற் போல, சங்கிலி நிகளம் பூட்டி -
சங்கிலியாகிய விலங்கினை பூட்டிச் சிறைப்படுத்தி, செங்கனல் சிதற நோக்கும்
சினம் கெழு காவலாளர் - சிவந்த நெருப்புப் பொறி சிதறப் பார்க்கும்
சினமிக்க தண்டலாளர், மங்குலின் இருண்ட கண்டர் தொண்டரை - முகில்
போலும் இருண்ட திருமிடற்றினையுடைய இறைவரது அடியாராகிய
வாதவூரடிகளை, மறுக்கம் செய்தார் - துன்பஞ்செய்தனர்.

     கருஞ்சிறை - பெரிய சிறை; இழிந்த சிறையுமாம். தவமே உருவாயினா
ரென்பார் ‘தவத்தினைச் சிறையிட்டென்ன’ என்றார். காவலாளர் தொண்டரை
அறையிற் போக்கி நிகளம்பூட்டி மறுக்கஞ்செய்தார் என வினைமுடிவு
செய்க. (13)

     (இ - ள்.) அவர் மிடைந்து தண்டம் செய்ய - அத்தண்டலாளர்
நெருங்கி அங்ஙனம் ஒறுத்தலைப்புரிய, வெஞ்சிறை வெள்ளத்து ஆழ்ந்து
கிடந்தவர் - வெவ்விய சிறையாகிய கடலில் அழுந்திக் கிடந்த அடிகள்,
கிடந்தோன் - பாற் கடலிற் கிடந்த திருமாலும், பூமேல் இருந்தவன் -
தாமரை மலர் மேல் இருந்த பிரமனும், கீழ் மேல் தேட - முறையே கீழும்
மேலுந் தேடா நிற்க, நடந்தவர் - நீண்டவரது, செம்பொன் பாதநகைமலர் -
சிவந்த பொன்போன்ற திருவடியாகிய ஒளி பொருந்திய மலரை,
புணையாப்பற்றி - புணையாகப் பிடித்து, துன்ப வேலை கடந்தனர் -
துன்பமாகிய கடலைக்கடந்தனர்; கங்குல் வேலை புலர்ந்தது - இராக்காலம்
விடிந்தது.

     பாற்கடலிற் கிடந்தோன் என ஒரு சொல் வருவித்துரைக்க. கிடந்தவர்
பாதமலர் புணையாப்பற்றித் துன்பவேலை கடந்தனர் என முடிக்க. கங்குல்
வேலை என்பதில் வேலை - பொழுது. (14)

     (இ - ள்.) அந்தம் இல் அழகன் தன்னை - அளவில்லாத
பேரழகனாகிய சோமசுந்தரக் கடவுளை, அங்கயற் கண்ணியோடும் -
அங்கயற் கண்ணம்மையுடன், சுந்தர அமளி - அழகிய படுக்கையினின்றும்,
பள்ளி உணர்த்துவான் தொண்டர் சூழ - துயிலுணர்த்துதற் பொருட்டு
அடியார்கள் நெருங்க, வந்தனை செய்யும் ஆர்ப்பும் - அவர்கள் வழிபடும்
ஒலியும், மங்கல சங்க ஆர்ப்பம் - மங்கலமாகிய சங்குகளின் ஒலியும்,