(இ - ள்.) நல்ல வாம்பரி செலுத்தினன் - நல்லதாவுகின்ற
குதிரைகளைச் செலுத்தி வந்தனன்; நமக்கு இனிக் கவலை இல்ல வாம்படி
ஆக்கினன் - (அதனால்) நமக்கு இனித் துன்பமில்லை யாமாறு
செய்தருளினன்; இன்னம் ஒன்று - (ஆனால்) இன்னும் செய்யவேண்டுவது
ஒன்றுளது; உலகை வெல்ல ஆம்படி - (அதாவது) உலகினை வெல்லத் தக்க
வண்ணம், தன் அருள் விளைக்கும் - தனது திருவருள் உண்டாக்கும்,
ஆனந்தம் புல்ல ஆம்படி - இன்பம் பொருந்தத் தக்க வண்ணம், எமைத்
தவம் பூட்டுவான் வேண்டும் - எம்மைத் தவநெறியிற் செலுத்துதல் வேண்டும்.

     இல்லவாம்படி - இலவாமாறு. வெல்லவும் புல்லவும் ஆகும் வண்ணம்
என்க. வெல்லாம்படி, புல்லாம்படி எனப் பாடங்கொள்வது சிறப்பு. பூட்டுவான் தொழிற் பெயர். (5)

     (இ - ள்.) என்ற ஆதரம் தலைக்கொள - என்ற விருப்பமீக்கூர,
இகபரத்து ஆசை ஒன்றும் இன்றியே - இம்மை மறுமை யின்பங்களில் ஆசை
சிறிதும் இல்லாமல், உணர்வினுக்குள் உணர்வாகத்துன்று - அறிவுக்குள்
அறிவாகப் பொருந்திய, பூரணமாகிய சுந்தரச் சோதி - எங்கும் நிறைந்த
பரம்பொருளாகிய சோமசுந்தரக் கடவுளின், மன்றுள் ஆடிய சே அடி -
வெள்ளியம்பலத்தில் ஆடியருளும் சிவந்த திருவடியை, மனம் புதைத்து
இருந்தார் - தமது உள்ளத்துட்கொண்டிருந்தனர்.

     முன்னரும் ‘இம்மையாசையும் மறுமையிலாசையும் இகந்து’ எனப்
போந்தமை காண்க. ஒன்றும் - சிறிதும். உள்ளுணர்வாக எனப்
பிரித்துரைத்தலுமாம். (6)