(இ - ள்.) ஞாளிகள் விழித்த - நாய்கள் விழித்தன; கேகயம் வெருவி
விழித்தன - மயில்கள் அஞ்சி விழித்தன; கோழிகள் விழித்த - கோழிகள்
விழித்தன; மதுகரம்வெருண்டு விழித்தன - வண்டுகள் பயந்து விழித்தன;
ஓதிமம் விழித்த - அன்னப் பறவைகள் விழித்தன; குருகு இனம் விரைய
விழித்தன - நாரையின் கூட்டங்கள் விரைந்து விழித்தன; வாரணம் விழித்த
- யானைகள் விழித்தன; கருங்கொடி வெள்ளம் விழித்தன - கரிய காக்கைக்
கூட்டங்கள் விழித்தன.

     கொடி - காக்கை. விழித்தற்குரிய பொழுது வருமுன் யாவும்
நள்ளிரவில் விழித்தன என்க. (25)

     (இ - ள்) நிணத்தினை அழல் பசி உருக்கப்பட்டு - சில நரிகள்
தங்கள் தசையினை அழல் போன்ற பசி உருக்குவதால், அட்டில் புக்கன -
சமையலறையிற் புகுந்து, அடுக்கிய கருங்கலம் உருட்டுவ - அடுக்கப்பட்ட
பழைய மட்பாண்டங்களை உருட்டி, பாகு சுட்ட சோறு பல் உணவு வாய்
மடுப்பன - குழம்பும் வெந்த சோறும் பல உணவுமாகிய இவற்றைத்தின்று,
சூழ்ந்த குட்டி உண்ணவும் கொடுப்பன - சூழ்ந்துள்ள குட்டிகள்
உண்ணுதற்கும் கொடுத்து, கூவிளி கொள்வ பேரொலி செய்வன.

     உருக்கப்பட்டு - உருக்க என்னும் பொருளாதாய் நின்றது. புக்கன
முதலிய முற்றுக்களை எச்சமாக்குக. பல் லுணவு - கறி, பழம் முதலாயின.
கூவிளி - கூக்குரல். (26)

     (இ - ள்.) புறவு பூவை பைங் கிள்ளைகள் - (சில நரிகள்)
புறாக்களையும் நாகணவாய்ப் பறவைகளையும் பசிய கிளிகளையும், பூத்தலைச்
சேவல் பிறவும் வாருவ - முண்முருக்கமலர் போன்ற சூட்டுப் பொருந்திய
தலையினையுடைய சேவல்களையும் இவை போன்ற பிறவற்றையும்
வாருகின்றன; உறங்கிய பிள்ளையைக் கொடு போய் -