அடுத்து எச்சமாகிற்று. போனார், வினையாலணையும் பெயர். வாணி -
வாக்கு. (61)

     (இ - ள்.) மறத்து ஆறு கடந்த செங்கோல் வழுதி - மறநெறியைக்
கடந்த செங்கோலையுடைய பாண்டியனே, நின் பொருள்கள் எல்லாம் -
நின்னுடைய பொருள்களனைத்தும், அறத்து ஆற்றின் ஈட்டப்பட்ட -
அறநெிறியிலே தேடப்பட்டன; அனையவை புனிதமான திறத்தாலே -
அப்பொருள்கள் தூயவாயுள்ளதன்மையினாலே, நமக்கும் நம்மைச் சேர்ந்தவர்
நமக்கும் - நமக்கும் நம்மை யடைந்த அடியார்கட்கும், ஆர்வம் உற -
அன்பு பொருந்த, தாவு இல் வாதவூரன் உதவினான் - குற்றமில்லாத
வாதவூரன் கொடுத்தனன்; ஆதலால் - அதனால்.

     அறநெறியால் ஈட்டப்பட்டன, அங்ஙனம் ஈட்டப்பட்டமையின் அவை
புனிதமான திறத்தால் என்க. ஆதலால் - அங்ஙனம் உதவினமை
காரணமாக. (62)

     (இ - ள்.) அனையனை மறுக்கம் செய்தாய் - அவ்வாதவூரனைத்
துன்பஞ் செய்தனை; அரும்பிணப் புலவுத்தீவாய் வனநரித்திரளை ஈட்டி -
அணுகுதற்கரிய பிணங்களின் புலாலையுடைய கொடிய வாயினையுடைய
வனத்திலுள்ள நரிகளைத் தொகுத்து, வாம்பரி ஆக்கித்தந்தேம் - தாவுகின்ற
குதிரைகளாக்கிக் கொடுத்தேம்; கனை இருள் கங்குற்போதில் கழிந்தன -
செறிந்த இருளையுடைய இராப்பொழுதில் (அவையாவும் நரிகளாகி) ஓடின;
பின்னும் - மீளவும், தண்ட வினையர்பால் விடுத்துத் துன்பம் விளைத்தனை
- ஒறுப்பாளரிடம் விடுத்து அவரால் துன்பம் விளைவித்தனை; அது
பொறாதேம் - அதனைப் பொறுக்கமாட்டேமாகி.

     மறுக்கஞ் செய்தாய் ஆதலின் ஆக்கித்தந்தேம் என்க. அவை கழிந்தன
எனச் சுட்டுப்பெயர் வருவித்துரைக்க. (63)