உலக மாளுதல் நரகத் துன்பத்திற்கு ஏதுவாமென தேனை வெறுத்துக்
கூறியவாறு. நோய்க்கு அருமருந்தும் ஆனீர் என உம்மை பிரித்துக்
கூட்டுதல் சிறப்பு. ஆனீர் ஐயா, பன்மை யொருமை மயக்கம். (68)

     (இ - ள்.) நான் உம்மை எண்ணாது - அடியேன் உமது உயர்வினைச்
சிறிதுங் கருதாது, செறுத்து இழைத்த இத்தீங்கு தன்னைப் பொறுத்து -
சினந்து செய்த இத்தீமையைப் பொறுத்தருளி, நீர் முன்போல் நுங்கள்
புவிஎலாம் காவல் பூண்டு - நீவிர் முன்போலவே நுமது புவி அனைத்தையும்
காத்தலை மேற்கொண்டு, மறு துடைத்து ஆள்வது ஆக என்று இரந்தனன் -
குற்றத்தைப் போக்கி ஆளக்கட வீராக என்று இரந்து வேண்டினன்;
மண்ணில் ஆசை வெறுத்தவர் - மண்ணின் கண் உள்ள விருப்பினை நீக்கிய
வாதவூரடிகள், நகை உள்தோன்ற - உள்ளே நகை தோன்ற, வேந்தனை
நோக்கிச் சொல்வார் - அரசனை நோக்கிக் கூறுவாராயினர்.

     நும்மை யெனப் பிரித்தலுமாம். இறைவனது திருவருளுக்குரியாரே புவி
முழுதுக்கும் உரியராவர் என்னுங் கருத்தால் ‘நுங்கள் புவியெலாங் காவல்
பூண்டு’ என அரசன் கூறினன். ஆள்வதாக - ஆள்க; ஆள்வது என்னும்
தொழிற்பெயருடன் ஆக என்பது சேர்ந்து வியங்கோளாயிற்று. ஆகென்று,
அகரந் தொகுத்தல். மண்ணிலாசை வெறுத்தவர் என்பது அவர் புவியாளார்
என்பது தோன்ற நின்றமையின் கருத்துடன் கூடிய விசேடியமாகும். (69)

     (இ - ள்.) பாய் திரைபுரளும் முந்நீர்ப்படு கடல் உலகுக்கு எல்லாம் -
பரந்த அலைகள் புரளுகின்ற மூன்று நீர்களையுடைய ஆழமாகிய
கடல்சூழ்ந்த உலகமனைத்திற்கும், ஆயிரம் செங்கணான்போல்
அரசுவீற்றிருப்பீர் - சிவந்த ஆயிரங் கண்களையுடைய இந்திரன்போல்
தனியரசாக வீற்றிருப்பீர்; உங்கள் நாயகன் அருளிச் செய்த வண்ணமே -
உங்கள் இறைவனாகிய சோமசுந்தரக் கடவுள் கட்டளையிட்டருளியபடியே,
நயந்து செய்வீர் - விரும்பிச் செய்வீர்; நுங்கள் சூழல் சேர்ந்து ஒழுக
வல்லார் - உங்கள் இடத்தைச் சார்ந்து நடக்கவல்லவர், தூயவர் அன்றோ -
தூய்மையுடையாரல்லவா.

     (பா - ம்.) * அரசு செய்திருப்பீர்.