(இ - ள்.) கனவினும் நீறுகாணாக்கைதவர் - கனவிலும் திருநீற்றைக்
காணாத வஞ்சகராகிய அப்புத்தர்கள், காட்சியானும் மனஅனுமானத் தானும் -
காட்சியளவையினாலும் கருதரளவையினாலும், வாசகப் பெருமான் தம்மை
வினவிய மூன்றும் - மணிவாசகப் பெருமானார் தம்மைக்கேட்ட மூன்றையும்,
உத்தேச ஆதியின் விரித்தார் - உத்தேச முதலியவற்றால் விரித்துக் கூறினர்;
வேதம் அனையவர் கேட்டு - மறைபோல்வாராகிய அடிகள் கேட்டு,
அம்மூன்றும் அனுவாதம் செய்து உட் கொள்ளா - அம்மூன்றினையும்
அனுவதித்து மனத்துட்கொண்டு.

     புத்தர்கட்குக் காட்சியும் அநுமானமுமே பிரமாண மாதலால்
‘காட்சியானு மனவநுமானத்தானும்’ என்றார். மனத்தாற் கருதியறிதலே
அநுமானம் என்பார் ‘மனவனு மானத்தானும்’ என்றார் என்க. வினவிய
மூன்று - இறை, நூல், கதி என்பன. உத்தே சாதியின் - உத்தேசம்,
இலக்கணம், பரீக்கை என்பனவற்றால். உத்தேசம் - கூறும் பொருளைப்
பெயர் மாத்திரையான் எடுத்தோதல்; இலக்கியம். இலக்கணம் - சிறப்பியல்பு;
அவ்வியாத்தி அதிவியாத்தி அசம்பவம் என்னும் முக் குற்றங்களும் இல்லாத
தன்மை. பரீக்கை - இலக்கியத்தில் இலக்கணம் உளதாதலை ஆராய்தல்.
உத்தேசாதி, தீர்க்கசந்தி. அறிவு நிறைவானும், தூய்மையானும் வேதத்தை
உவமை கூறினார். அனுவாதஞ்செய்தல் - பிறர் கூறியவற்றை ஒருபயன்
நோக்கித் தான் எடுத்து மொழிதல். ‘ஆதியுத்தேசத்தானு மிலக்கண
வமைதியானும் சோதனை வகைமையானுஞ் சொன்னநூலனுவாதித்து’ என்னும்
தடாதகைப்பிராட்டியார் திருவவதாரப்படலச் செய்யுளுரையில்
உரைத்தமையுங் காண்க. (102)

     (இ - ள்.) இன்று இவர்க்கு அனுமான ஆதி எடுப்பது என்என்று -
இப்பொழுது இவர்கட்குக் கருதல் முதலிய அளவைகளை எடுத்துகூறுதல்
எதற்கு என்று கருதி, காட்சி ஒன்றுகொண்டு - காட்சியளவை ஒன்றினாலே,
அவர்கள் தாமே உடம்படல் மறுத்தார் - அவர்களே உடன்படுமாறு மறுத்து,
காட்சி அன்றி ஏது இன்மையாலே - காட்சியளவை இன்றி ஏது
இல்லையாகலின், உங்கோன் ஆதி நிறுத்திய மூன்றும் - உமதுகடவுள்
முதலாக நீர் நிலைநிறுத்திய மூன்றும், அனுமான அளவையாலும் நின்றஅன்று
என்றார் - கருதலளவை யாலும் நின்றன அல்ல என்று கூறியருளினார்.

     அனுமானாதி - அனுமானமும் உரையளவையும். உடம்படல் -
உடம்படுங் கொள்கையை என்றுமாம். இறை முதலிய மூன்றும் காட்சிக்
கெய்தாமையின் காட்சியளவையானும், காட்சியின்றி அனுமானத்திற்குச் சிறந்த
கருவியாகிய ஏது பெறப்படாமையின் அனுமான வளவையானும் அவர்
அவற்றை நிறுவலாகாமை யுணர்க. தீக்கும் புகைக்குமுள்ள உடனிகழ்ச்சியை
அடுக்களை முதலியவற்றிற் கண்டிருந்தாலன்றி ‘இம்மலை தீயுடைத்து;