(இ - ள்.) அந்தணாளிர் எங்கு இருந்து வந்தனிர் என்றார் -
அந்தணாளரே எங்கிருந்து வந்தீரென்று வினாவினர்; ஆய்ந்த புங்கவன் -
கலைகளை ஆராய்ந்த தூயவனாகிய அம்மறையவன், சென்னி பொன்னி
நாட்டினும் போந்தேன் என்றான் - சோழனது காவிரி நாட்டிலிருந்து
வந்தேனென்று கூறினன்; அவர் அங்கு உண்டான புதுமை யாது அறைதிர்
என்றார் - அவர் அங்கு உண்டாகிய புதுமை யாது அதனைக் கூறுமென்று
கேட்டனர்; சங்கரற்கு அன்பு பூண்டோன் உண்டு என்று சாற்றுகின்றான் -
சங்கரனுக்கு அன்பு பூண்ட அவ்வந்தணன் புதுமை உண்டு என்று அதனைக்
கூறத் தொடங்கினான்.

     அன்பு பூண்டவனும் புங்கவனுமாகிய அவன் என்க. அங்கவர் என்புழி
அங்கு அசைநிலை. அங்கு யாதேனும் புதுமையுளதாயின் அதனைக் கூறுதி
ரென்றார் என்பது கருத்தாகக் கொள்க. (17)

     (இ - ள்.) காழியில் - சீகாழிப்பதியின் கண், ஏழ் இசை மறை
வல்லாளர் ஒருவர் சிவபாத இதயர் என்ன உள்ளார் - ஏழு இசைகளையுடைய
மறையில் வல்ல வேதிய ரொருவர் சிவபாத விருதய ரென்னும்
பெயருடையராய் இருக்கின்றார்; கார் அமண் கங்குல் சீப்ப - (அவர்) கரிய
அமணாகிய இருளை ஓட்ட, ஆழியில் இரவி என்ன ஒரு மகவு அளித்தி
என்னா - கடலிற் றோன்றிய இளஞ் சூரியனைப் போல ஒரு புதல்வனை
அளிக்கக் கடவை என்று, ஊழியில் ஒருவன் தாளை உள்கி நோற்று ஒழுகி
நின்றார் - ஊழிக்காலத்தில் ஒருவனா யுள்ள இறைவன் திருவடியை நினைந்து
தவஞ் செய்தனர்.

     பேரூழிக் காலத்தில் உலகுயிரனைத்தையும் தம்முளொடுக்கிக் கொண்டு
தாம் ஒருவராகவே யிருத்தலின் ‘ஊழியிலொருவன்’ என்றார். (18)

     (இ - ள்.) ஆயமாதவர்பால் - அந்தத் தவப் பெரியாரிடத்து, ஈசன்
அருளினால் - இறைவன் திருவருளால், உலகம் உய்ய - உலகம் உய்தி
பெறுதற் பொருட்டு. சேய் இளங் கதிர்போல் வந்தான் - ஒரு புதல்வன

்      (பா - ம்.) * போயின மூன்றாமாண்டில்.