(இ - ள்.) அக்கணத்து அரசனை அடுத்தது - (அத்தீயானது)
அவ்விநாடியிலே கூன்பாண்டியனை அடைந்து, வெப்பு நோய்
ஆகித்தொடுத்தது - சுர நோயாகிப் பற்றியது; (அதனால்), இட்ட
பல்கலன்களும் துகள்எழ - அவன் அணிந்த பல அணிகளும் பொரிந்து
தூளாகவும், பனிநீர் மடுத்த சாந்தமும் கலவையும் மாலையும் கருக - பனிநீர்
விட்டு மட்டித்த சந்தனமும் கூட்டுவர்க்கமும் மாலையுங் கருகித் தீயவும்,
படுத்த பாயலும் சருகுஎழ - படுத்திருக்கும் படுக்கையும் வெந்து சருகாகவும்,
புரவலன் பதைத்தான் - அவ்வேந்தன் பதைத்தனன்.

     அடுத்தது, முற்றெச்சம். துகளெழ முதலிய வினை யெச்சங்கள் நிகழ்
காலத்தில் வந்தன. துகளெழ, கருக, சருகெழத் தொடுத்தது என
முடித்தலுமாம். (46)

     (இ - ள்.) வளவர் கோன் திரு மடந்தையும் - வளவர் கோன்
பாவையாகிய மங்கைர்க்கரசியாரும், மந்திரர் ஏறும் - அமைச்சரேறாகிய
குலச்சிறையாரும், தளர்வு அடைந்து - தளர்ச்சியுற்று, நல் மருத்து நூல்
விஞ்சையர் தமைக் கூய் - நல்ல மருத்துவ நூல் வல்லாரை அழைத்து -
பளகுஇல் பல் மருந்து அருத்தவும் - குற்றமில்லாத பல மருந்துகளை
அருத்துவதனாலும், பார்வையினாலும் - மந்திரித் தலினாலும், விளைவதே
அன்றி - மேலும் மேலும் முதிர்வதே யல்லாமல், வெஞ் சுரம் தணிவது
காணார் - கொடிய அவ்வெப்பு நோய் தணிவதைக் கண்டிலர்.

     கூவி என்பது விகாரமாற்று. அருத்தவும் - ஊட்டுதலினாலும். பார்வை
- மந்திரித்தல். விளைதல் - முதிர்தல். (47)

     (இ - ள்.) சவலை நோன்பு உழந்து - உடல் மெலிதற் கேதுவாகிய
நோன்பினால் வருந்தி, இம்மையும் மறுமையும் சாரா - இம்மைப் பயனையும்
மறுமைப் பயனையும் அடையாத, அவலம்மாசரை விடுத்தனர் - தவவலியற்ற
இருவகை அழுக்கினையு முடைய சமணர்களை விடுத்தனர்; அனைவரும்
அவரனைவரும், தவவலியினும் மருந்தினும் பார்த்து தணிந்திலதாக - தமது
தவவன்மையினாலும் மருந்தினாலும் பார்த்தும் அந்நோய் தணியாதாக,
கவலை எய்தினார் இருந்தனர் - கவலையுற்று இருந்தனர்; கங்குல் விடிந்தது
- இரவு விடிந்தது.