(இ - ள்.) பொய்யர் சார்பினை விடாதவன் - பொய்யர்களாகிய
சமணர்களின் சார்பினைவிட்டு நீங்காத பாண்டியன், ஈங்கு நீர் புகன்ற சைவர்
- இப்பொழுது நீர் கூறிய அச்சைவர், நீறுஇட்டுப் பார்ப்பது தகுவதோ என்ன
- திருநீறிட்டு என்னைப் பார்ப்பது தகுவதொன்றோ என்று கூற, ஐய -
ஐயனே, நீ எனைத் திறத்தினால் ஆயினும் - நீ எந்த வகையினாலாவது,
நோய் தீர்ந்து உய்யவேண்டுமே - நோய் நீங்கிப் பிழைக்கவேண்டுமல்லவா,
இதனில் உறுதி யாது என்று உரைத்தார் - இதனினும் நன்மை யாது
உளதென்று உரைத்தனர்.

     நீர் புகன்ற - நும்மாற் கூறப்பட்ட. நீறு இட்டுப் பார்ப்பது - திரு நீறு
போட்டு நோய் தீர்ப்பது; திரு நீறு பூசி வந்து பார்ப்பது என்றுமாம்.
எனைத்து என்பது எனை என நின்றது. சைவர் நீறிடுதலால் உய்வது
உறுதியாமன்றி அது தகாதென மறுத்து உயிரிழப்பது உறுதியாகா தென்பார்
‘இதனில் யாது உறுதி’ என்றார் என்க. (51)

     (இ - ள்.) ஈண்டு அழைமின் என அரசனும் இசைந்தனன் - இங்கு
அழையுங்கள் என்று அரசனும் உடன் பட்டனன்; ஆர்வம் தழையும் மந்திரத்
தலைமகன் - விருப்ப மிகும் அமைச்சர் தலைவனாகிய குலச்சிறையார்,
தனிநகர் எங்கும் விழவு தூங்க - ஒப்பற்ற நகர் முழுதும் திருவிழாப்
பொலிவுற, நல்மங்கலவினைகளால் விளக்கி - நல்ல மங்கலச் செயல்களால்
நகரை அலங்கரித்து, இன் மழலை தமிழ் விரகர் தம்மடத்தில் வந்து எய்தா
- இனிய மழலை மொழியினையுடைய முத்தமிழ் விரகர் எழுந்தருளிய திரு
மடத்தில் வந்து சேர்ந்து.

     அவர் உரைத்தமை கேட்டு அரசனும் இசைந்தனன் எனவும், அதனால்
ஆர் வந்தழையும் மந்திரத் தலைமகன் எனவும் விரித்துரைக்க. மங்கல
வினைகள் - கொடி யெடுத்தல், தோரணங் கட்டுதல், மாலை தூக்கல்
முதலாயின. மழலை போலும் இனிய தமிழ் என்றுமாம். (52)